登入 直接訂購 如何使用?

【盤房來料】港鐵趁盈警搵位上車

聯儲局再有官員放鴿,令原本今個月聯儲局減息半厘機會由本來不足五成,升至七升,寬鬆貨幣政策令市場氣氛回復熾熱,令早段下跌嘅美股拗腰回升,道指亦由挫逾百點逆轉跌勢至倒升收場。港股今早亦做好,半日升逾三百點。
恒指高開123點,成功收復10日(28454點)及20日線(28520點),雖然開市後升幅一度收窄至89點,低見28551點,仍守10日及20日線,之後回勇,更成功突破100日線(約28644),最多升347點,見過28809點半日高位。中午恒指報收28772點,升310點;國指半日報收10929點,升145點。

雖然中美貿易談判作未有新一輪時間表,但雙方再通電話,令市場憧憬中美雙方談判可於短期內再展開,令市場氣氛再好轉。藍籌重磅股各有表現,騰訊(00700)半日升1.2%,重返360元以上,總算遠離350元支持死線。而友邦(01299)半日升2%,再創新高,以友邦喺內地市場嘅發展潛力,友邦可享有較高估值。等咗幾日中生製藥(01177)終於衝上9元樓上,阿Man一直睇好中生製藥,以走勢嚟睇,中生股價重返雙位數指日可待。

港鐵(00066)發盈警,表示需要為沙中線紅磡站及屯馬線作出20億元撥備,及英國First MTR South Wstern Trains Limited作出4.3億元撥備,兩項撥備合共24.3億元。雖然大摩唱淡叫沽售,但阿Man反而認為趁地鐵呢下回調,係買貨好機會。由於地鐵仍有大把地產發展項目排住隊等入帳,兼且公司已表示撥備亦會維持一貫派息政策,區區24億撥備,對地鐵影響有限,股價跌至10日及20日線之間,於20日線見支持,選擇現價入市,可以50元為終極止蝕位,都唔係無得博。

至於手機設備股今日表現唔錯,有調查機構指華為喺全球手機市佔率提升至15.7%,備應商之一嘅舜宇(02382)半日升3.8%,為半日升幅最大藍籌股。其他手設股半日普遍上升,升幅由不足一個%至超過5%不等。

阿Man呢期一直唱好黃金價格,隔晚金價再度上揚,紐約期金更續創6年收市新高,金礦股全線向好,而阿Man至愛嘅SPDR黃金ETF(02840)半日升1.5%,所以話點可以冇佢看門口。

麥狄文
(徐狄怡‧證監會持牌人 滙盈資產管理‧董事總經理)

 

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。