登入 直接訂購 如何使用?

【盤房來料】一國一制陰霾下 保本保命為上策

以為兩會舉行有利好消息刺激個市,消息就有喇,但一啲都唔利好,更加係重量級利淡消息。阿爺唔等九月立法會選舉,人大先為香港訂立國家安全法。侵侵已表態對於阿爺此舉將作強烈回應,市場推測最差情況係取消香港獨立關稅區地位。本來喺肺炎疫情下,香港經濟已差到一個點,喺一國一制陰霾下,沒有最差只有更差。

恒指裂口低開523點,23756點開市價已經係半日高位,開市後跌幅持續擴大,半日一路踩住地板插落去,完全無彈過。半日最多跌1151點,見半日低位23128點,係自4月3日以嚟新低。中午恒指報收23160點,半日跌1119點;國指報收9466點,跌383點。

由於大市已失守近日上落區間底部,即23500點,確認跌勢首站先睇22800點,不過呢個位支持力度有限,下一個大位要數22500點,再失當然係睇22000,甚至再一次考驗3月份低位,即21139點。之前阿Man一路講,指數喺23500至24500點之間上落,唔走出呢個範圍都未可以突破,家下跌穿range底,即係突破向下,咁由range底計算,跌一千點係最低消費。

藍籌股全軍覆沒,最重磅嘅騰訊(00700)、友邦(01299)跟大笨象(00005),分別跌4.1%、6.2%及4.7%。強如港交所(00388)半日亦跌3.2%,不過阿Man都講過,港交所首個目標260元已達標,可以用265元做止賺持有,今朝開市無耐失守呢個價,落車沽貨套利袋袋平安。本地地產股及收租股亦係重災區,閒閒地跌4%,最多嘅跌超過8%,都咪話唔大鑊。

由於市場擔心香港失去其獨特性,最終淪為中國大灣區其中一個城市,競爭力及吸引力下降,外資或考慮撤離,本港經濟將會進一步轉差,本地零售及餐飲股同樣面對嚴重沽壓,板塊內股份跌4%至近一成不等。

今日港股似乎要插到尾,估計首站22800點應會停一停,今日一步到位,而半場成交急增至逾八百億元,反映缸邊友要錢唔要貨嘅心態。呢個時候勸大家唔好多手,要止蝕就嚴格執行,輸咗都要認錯,保本保命將來先有機會再戰缸湖,來日方長,要緊記股市長過命。

麥狄文
(徐狄怡‧證監會持牌人)

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。