登入 直接訂購 如何使用?

【盤房來料】強勢板塊強勢不再 散水意味漸濃

對於中國喺香港引入「港版國安法」,今日人大會議將表決,通過係毫無懸念,至於落實細節同埋點執行,已經唔再重要,因為所謂嘅五十年不變,港人治港,高度自治,已成為過去式……侵侵已經打晒開口牌,話一旦國安法喺香港實施,美國一定會強烈回應,結果隔晚美國國務卿蓬佩奧先打響第一炮,向國會作證指香港不再具備高度自治,令香港特殊地位存疑。

即使隔晚美股做好,港股完全唔跟,縱使有消息指北水將全力護航,港股半日仍要跌逾400點,重返23000水平之下。恒指低開94點,早段確見維穩資金硬食,令開市後無耐曾倒升150點,見23451點半日高位,但23500今日連影都唔見,都知係虛火。其後內地A股亦腳軟,港股沽壓再現,恒指再失守23000點,見22878點回補周二反彈上升裂口。半日恒指報收22878點,跌422點,幾乎係半日最低位;國指則報收9464點,跌102點。

中美關係再度惡化,美國業務佔比較重嘅創科(00669)半日跌4%,係表現最差藍籌。而北水力掃建行(00939)跟工行(01398),半日兩股逆市升0.3%及0.4%,兩股都係指數權重股,北水要護航,掃住啲內地金融股都合理。
本地地產股又成重災區,一旦香港失去特殊地位待遇,香港即與內地任何一個城市無異,港樓無優勢,樓市依家仲企高位,都係時晨未到,本地地產股低處未算低。

噚日阿Man已發覺強勢股開始乏力,雖未見明顯轉弱,但強勢不再隨時轉角,騰訊(00700)半日跌逾3%,阿里巴巴(09988)亦跌2.5%,小米(01810)則跌逾3%。ATMX之中,仍然係美團(03690)最硬淨,早段曾升至138.8元高位逆市上升,但亦難敵其他新經股跌勢,中午轉跌一粒神。

華為太子女喺楓葉國未有如傳聞般獲釋放,反而有機會被引渡至美國受審,手機設備股憂慮華為再成風眼,整個板塊半日跌勢顯著,當中高偉電子(01415)更跌逾一成。中興(00763)半日亦跌逾半成。

醫藥股今日沽壓亦嚴重,石藥(01093)季績表現差過預期,半日股價跌12%,其他醫療股閒閒地跌5%或以上。而之前熱炒嘅醫藥B股,喺龍頭康希諾(06185)急挫下,齊齊過堂。

雖然阿Man相信香港唔會即時失去特殊地位,皆因美國亦有唔少企業同權益喺香港,疏散撤退都要時間,但要嚟嘅始終要嚟,喺失去特殊地位呢個陰霾下,實在搵唔到一個理由,呢個時候仲要入場買港股。加上美國並唔係得取消香港特殊地位一招,中國點去反制亦成疑問,咁嘅情況下,買定花生等睇戲。

麥狄文
(徐狄怡‧證監會持牌人)

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。