盤房來料丨港股反彈力弱 暫未能跟隨外圍步伐

經過上周五美股急跌後，華爾街大行派定心丸，稱上周五美股急跌屬健康回調，美股噚晚喘定，三大指數個別發展。道指高開130點後，升幅一度擴大至410點，高見51277，但其後掉頭回落，收市報50786，再跌80點或0.16%；標指反彈21點或0.3%，報7405；納指反彈220點或0.86%，報25929。

重磅股中，Tesla及Nvidia收市分別反彈4.6%及1.7%；Meta否認配股集資的報道，但股價繼上周五急跌7%後，周一再跌1.3%。蘋果公司喺全球開發者大會(WWDC)上宣布推出AI版Siri，股價一度抽高3.3%，不過，Siri AI暫時唔會喺中國地區及歐盟市場推出，股價倒跌1.9%收市。

上周五阿Man喺跌市中撈嘅貨，開市無奈就全部出清，先係400沽咗DELL，盤後企返400；MU本來想將止賺set去880，但見開市無耐就反彈一成，940嗱嗱臨落咗車，但盤後股價又升返上10日線950上面，今晚再睇下有冇位上返車。MRVL一嘢彈返上去300樓上，set返個290止賺，盤中又止賺咗258撈嘅貨，盤後又升返上290樓上，同樣睇下今晚有咩位可以撈返。NBIS收市前中返個218買盤，盤後彈返上220，唔知有冇彈高啲去返10日線235附近。

CRWV止咗100之後無再買返，AVAV穿200走先無錯，噚晚都唔係好跟個市反彈。至於ONDS、KLAR同GOOG無郁過，暫時兩隻都無穿防守位。至於INTC見有消息又接到新單，盤前100又狗衝返，結果收市升一成，暫時都係繼續持有，反正有平貨底。

噚日有提到NQ要企返條20日線29700先叫穩定返，結果盤中彈到29700企唔穩就掉頭，回返去29400至29500，噚日提到嘅反彈最後一個阻力見支持，即係29400暫時由阻力變支持，今晚睇實呢個位。NQ今晚個分水嶺為29500，支持29400/29300/29200，阻力29600/29700/29800。

雖然上周五科技股急跌，費城半導體指數上周五創2020年以來最大單日跌幅，納指跌逾4%，但摩根士丹利策略員Michael Wilson維持標指今年底升見8000點的目標，以反映盈利預測調升及利好宏觀數據。花旗美股策略主管Scott Chronert亦助攻，將標指年底目標從原先7700點，上調至8100點，較上周五收市近一成上漲空間，因盈利預測獲大幅調升。不過高盛策略員Ben Snider就撥冷水，表示部份指標顯示美股樂觀情緒已高於歷史平均水平，而投機狂熱雖然唔係判斷市場可靠指標，但仍然係過去高估值、高度集中牛市頂部特徵。

昨日港股一如所料低開，早段最多跌503點至24458低位，收市跌幅收窄至304點，報收24657，連跌四個交易日，亦為經過四周下跌幅，第五周開盤續跌。昨日恒生指數遺下一個下跌裂口，24837-24928，短線如外圍反彈，港股或於本周先回補此下跌裂口，但能否企穩裂口頂部即24900水平，視為後續反彈可持續與否之關鍵。至於重要支持為昨日低位約24400及3月低位24200，如未再有新壞消息出現，則此水平料有一定支持。

今早恒指低開105點或0.4%，跌幅一度擴大至最多170點，低見24486後喘定，外圍股市及A股表現唔錯，好友反攻，大市最多回升9點，高見24666，但無以為繼未能企穩24700水平。結果半手恒指跌36點或0.15%，報收24620。國指先跌後升7點或0.09%，報8348；科指先跌後升29點或0.62%，報4785。大市半日成交1557.08億元，北水淨流入41.28億元，連續三個交易日錄得淨流入。

暫時港股反彈方面仍面對阻力重重，港股要展開反彈，恒指首要企穩24700水平，即重返日線保力加通道內，首個反彈阻力為上周五低位24900-25000，即昨日下跌裂口頂部，而下一阻力為10日線約25300水平，下一阻力為25600-25700，為20日線、50日線及250日線滙聚區，至於100日線約26000-26100水平阻力更大。除非能企穩於26000水平之上，港股方能擺脫目前弱勢。留意本周三及四美國將公布CPI及PPI，兩數據為市場考量聯儲局下周議息有直接指引作用，如兩者公布遠高於預期，料將再度引發市場憂慮聯儲局不僅未能減息，甚至有需要加息，一旦市場認定聯儲局或有加息需要，料再沖擊環球股市，屆時港股亦難獨善其身。

麥狄文

(徐狄怡‧證監會持牌人)