【盤房來料】港股連升三日要唞唞

雖然美國10年期債息重上3厘，但市場都開始習慣嚟緊都仲要加息，美股之前跌得咁甘，超賣後反彈係必然嘅事。尤其係5月全球基金持有嘅現金水平，已創下20年新高，唔單止反映美股流動性十分充裕，仲要係啲基金大佬無乜貨可以沽，咁美股要反彈，當然夠力水。只不過美國聯儲局到6月先開始正式縮表，縮表之後會唔會保持到咁充裕嘅流動性，同埋債息繼續再升嘅話，對美股後市都係有負面影響，所以暫時美股只能視為熊市中嘅反彈，話美股轉勢，甚至牛市重來言之尚早。

至於港股噚日已先行一步，連續三個交易日恒指升逾1200點後，今早略為高開後即見回吐，恒指高開71點，見咗20674半日高位即掉頭向下，一度跌212點，見20389半日低位，但20天線(約20347)似有支持，其後跌幅收窄。半日恒指收報20471，跌131點；國指跌62點，報7014；恒科指跌73點，半日收4199。半日成交額只有599.2億元，又係悶局一場，買賣兩閒。

藍籌股個別發展，重磅嘅大笨象(00005)同港交所(00388)回吐，只有友邦(01299)仍然逆市上升，早段高開見過80.25元，可惜80元企唔穩，半日僅升0.3%，報77.8元。唔係阿Man睇死啲內銀股，事實係噚日升市升唔起，今日跌市又跟跌，坐住呢啲貨，唔輸死都悶死。半日表現最好嘅藍籌係創科(00669)，最大嗰個客Home Depot季績理想兼上調全年業績指引，創科受帶動下半日升3.7%。

科網股今日回吐，京東(09618)業績好過預期，但網購業務受疫情重擊，股價半日回落2.5%，旗下京東物流(02618)首季虧損收窄，但股價半日仍要跌7.5%。其他ATMX亦全線回吐，騰訊(00700)今日收市後公布業績，但半日跌2.5%，派成績表前股價先回都好，皆因之前業績前炒上，業績後股價必定腳軟。阿里(09988)跟美團(03690)半日齊跌2.8%，跟住仲有到小米(01810)明日公布季績，股價半日回0.6%，回吐壓力唔算大。其他科網股普遍腳軟，幅度由不足1%至超過3%不等。

汽車下鄉政策有機會喺6月初出台，汽車及相關零件股噚日已落鑊，今日再下一城，板塊續逆市上升，比亞迪(01211)半日升1.9%，盤中一度升逾260元，到咗阿Man提到嘅短線目標。其他汽車股及汽車零件股普遍向上，車股以蔚來(09866)半日升7%至勁，零件股就敏實(00425)跑出，半日升5.7%。

半日港股暫時略為回吐，但美股仍處反彈浪中，喺無乜利淡消息嘅情況下，港股又唔見得要急急腳落返去，可能先喺20天線水平爭持一陣，再儲儲力先可以發力再上，其實阿Man一直都係擔心成交問題，無新資金流入，港股繼續塘水滾塘魚，上又唔夠力，落又因為估值便宜唔隊得太深，繼續區間上落。

麥狄文
(徐狄怡‧證監會持牌人)