【盤房來料】醫療醫藥股抖抖 資金充裕者可趁低吸

美股隔晚早段因為幾個因素下跌，其中道指更跌逾500點，主要係國會未能就新一輪刺激經濟方案達成協議，市場擔心喺今日當加碼失業救濟金計劃完結後，失業大軍又企咗喺度。而美國隔晚公布嘅GDP，係有紀錄以嚟表現最差嘅一季數據，雖然第二季經濟收縮32.9%已經好過預期，但亦係二戰後最傷嘅一季，都成為資金沽貨嘅藉口。加上侵侵失驚無神喺社交平台表示有意將11月總統大選押後，即使按規定佢無權咁做，但令市場擔心不明朗因素增加，美股早段下向震盪。不過科技股表現仍然標青，納指拗腰向上，收市倒升，四大科企收市派嘅成績表全部好過預期，帶動美股期貨今早向上。

恒指高開36點，早段曾升228點，見24938點半日高位，可惜暫受制10日線(24941點)，係A股下跌拖累下，恒指最多倒跌175點，見24534點半日低位，曾一度跌穿50日線(24682點)後喘穩。恒指中午收報24764點，升53點；國指則報收10141點，升44點。

美國聯儲局已表示將維持寬鬆貨幣政策一段時間，暫無意加息，美匯指數創26個半月新低，推動金價做好，重返1970美元高位，目前於1967完水平附近。金價做好金礦股又見資金流入，呢一輪金礦股升勢跑贏黃金ETF。

蘋果公司上季業績遠勝預期，帶動蘋概股瑞聲(02018)做好，半日升4%，係最佳表現藍籌。瑞聲日前公布為光學業務引入4名戰略投資者，未來光學產品研發及質量將更具競爭力。而公司引入新投資者嘅戰略舉措，有助釋放光學資產價值，股價大有條件追落後。但留意股價在65元前阻力較大，不妨候低吸納，唔使心急追貨。而其他非蘋果嫡系嘅手設股，半日同樣錄得理想表現，升幅至少2%或以上。

大型內房股分拆物管公司上市已成習慣，不過恒大(03333)到依家先計劃分拆物管公司上市都算遲，股價半日升1.6%，阿Man冇乜興趣買恒大，要揀內房股，負債比率最高嘅恒大唔會係阿Man杯茶。反而過往推介內房股時，阿Man偏好合景泰富(01813)及世茂(00813)，前者旗下物管公司合景悠活已入咗上市申請表，而世茂旗下嘅世茂服務，亦喺上個月向港交所(00388)，兩股半日分別升近一成及3.2%。

今日係7 份最後一個交易日，雖然大市喺呢個月受中美爭拗所影響，先升後回，但呢個幾兩個星期大市喺24500至25200點之間拉鋸，唔上唔落，繼續炒股唔炒市。單係阿Man較早前推介嘅思摩爾(06969)已經夠食。噚日推介嘅祖龍娛樂(09990)今日表現亦唔差，今日再創上市後新高。

反而呢期的生化藥股同醫療器械股停滯不前，主要係近來呢個板塊頻頻向市場抽水，基金大戶接貨接到飽飽滯滯，反而低位坐上嚟嘅投資者沽貨鎖定部份利潤，令到呢個板塊近日表現麻麻。加上泰格醫藥(09913)招股亦抽走部份資，呢期醫藥醫療股要抖抖，但資金充裕嘅投資者可趁呢段時間收集。

麥狄文
(徐狄怡‧證監會持牌人)