【盤房來料】大市跌勢未止 未宜輕舉妄動

美股隔晚跌勢顯著，三大指數跌近2%或以上，港股噚日反彈已見乏力，隔晚ADR及夜期繼續腳軟，今日跌勢持續，當中以恒科指跌3%最傷。恒指低開204點，跌幅曾縮至152點，見23590點半日高位，但大市沽壓重重，跌勢再度轉急，半日最多跌446點，低見23296點，創5月29日後最低。恒指半日報收23319點，跌422點；國指中午報9388點，挫169點；恒科指半日報7077，大跌220點。

藍籌股幾乎全線下跌，金融股無論係國際金融機構抑或內銀股，無一倖免，工行(01398)與建行(00939)各跌1.5%，友邦(01299)跌幅相近。本地銀行東亞(00023)半日急挫近一成，策略檢討後，大行唔多滿意，沽貨以行動反映不滿。大笨象(00005)噚日死貓彈後，今日又死過，半日跌2.4%，話咗28元供股價唔係乜嘢支持位，所謂供股鐵底，不過係坐咗艇嘅苦主，自我安慰嘅說法。旗下恒生(00011)就堅係陰公，股價七連跌，半日再跌近3%。至於另外兩間發鈔銀行渣打(02888)跟中銀香港(02388)，分別跌1.3%及2.4%。

隔晚美國科技股跌到一仆一碌，港股呢邊嘅科技股又豈可獨善其身，半日恒科指插水3%，整個板塊今日都要捱沽。ATMX兩隻巨無霸騰訊(00700)跟阿里(09988)跌逾1%，而美團(03690)跟小米(01810)跌得較急，半日齊跌4.7%。其他科技股閒閒地跌1.5%以上，之前all time high嘅比亞迪電子(00285)今日揩得較甘，半日跌5.7%。
雖然市場避險情緒升溫，但黃金作為避險工具之一，喺美匯指數回勇下無運行，金價已失1920美元支持位，暫時險守1850美元另一支持位，但金價已跌至超過兩個月低位，金礦股插水，跌幅至少1.7%，而中國黃金國際(02099)更大跌7.3%。

講咗幾日大市情況不妙，未宜輕舉動，目前恒指逼近5月28日由22781點抽升至翌日23539點嘅上升裂口，唔排除短線有機會回補，剛好殺清恒指牛證重貨區23000至23500。其實呢個上升裂口早日回補，反而對後市發展更有利，即使未能完全回補整個上升裂口，至少落到23000水平殺牛，有心撈貨都係睇定啲好，有錢唔憂無貨買，幾時都係寧買貴，莫買錯。

麥狄文
(徐狄怡‧證監會持牌人)