【盤房來料】小米中線睇好 無懼花旗唱淡

港股今早升勢不俗，原以為高開高走至24800阻力後，可貼近高位整固，豈料內地第三季土GDP差過市場預期，港股升幅縮水咗半，恒指目前受制於50日(24572點)及(24684點)，恒科指半日到倒跌。恒指高開178點，其後升幅擴大至385點，高見24771點，但內地上季GDP數據略差過預期，恒指50日及100日線得而復失，升幅一度縮水至不足100點，見24478半日低位。恒指半日收報24554，升168點；國指午造10003，升88點；恒科指半日收7602，倒跌2點。

雖然內地GDP遜於市場預期，但無礙內銀股反彈，呢個板塊由上周起開始追落後，工行(01398)半日升3.6%，係最大升幅藍籌股，建行(00939)跟中行(03988)亦升逾2%，其他內銀股閒閒地升2%或以上，只有信行(00998)跟光大銀行(06818)半日升1.2%及1%，稍遜一籌。內銀股本周可以繼續做好，係因為內地見經濟漸漸復甦，內銀或唔需要讓利太多，今年業績未必會好差，加上呢個板塊又確係落後得緊要，有資金追落後股亦好正常。只係阿Man反而擔心連最落後嘅內銀都落鑊，大市呢輪反彈恐怕又接近尾聲。

其他藍籌股個別發展，ATMX之中以小米(01810)表現最差，當華為被制裁，大家都指小米可受惠之際，花旗卻突然轉軚唱淡，建議沽售，仲要將其目標價調低至廿皮樓下，搞到小米半日跌咗3%，藍籌之中跑第尾。不過阿Man對小米後市仍睇好，一份花旗報告亦難扭轉小米業務及收入持續改善嘅事實，加上華為手機嘅市場份額，喺美國制裁下定必縮水，小米跟其他品牌如三星，應該係華為被制裁嘅贏家，只要小米股價守住22元，之前建議20至22元嘅收集嘅小米，坐定定，冇有怕。

其他藍籌個別發展，阿里(09988)旗下螞蟻集團上市計劃料未有太大阻滯，兼且估值上仲由最初2500億美元提高至2800億美元，螞蟻愈賣愈高價，阿里當然水漲船高。至於其他重磅藍籌股都係咁上下，只要大市仍有動力向上挑戰24800至25200點，強勢藍籌如騰訊(00700)、阿里都無諗過要急住落車。阿里以280億元收購吉鑫控股70.94%股權，交易完成後，阿里連同其關聯方將持有高鑫約72%的經濟權益，帶動高鑫零售(06808)半日勁升18%，但高位未能企穩，而250日線10.22阻力大，無貨都係食花生算喇。

蘋果iPhone12及12 Pro預購成績好過iPhone 11，內地銷情亦理想，有助產業鏈股反彈，其中鴻騰(06088)半日升逾13.6%，皆因蘋果提高其手機配件使用量，股價追落後有其道理。而其他手設股附比亞迪電子(00285)回吐外，其餘均見做好。若然要揀隻嚟買，阿Man都係較睇好光學設備生產商舜宇(02382)。內地醫療帶量採購計劃伸展至冠脈支架，呢方面嘅一彈微創醫療(00853)捱沽，半日跌近9%，其他醫療設備股普遍下跌，暫時呢個板塊未知跌定未，都係眼看手勿動。