【盤房來料】中招等政府派五千救濟 不如買受惠股發疫情財
雖然上周五美股回調,但港股開市未受影響,但開市後缸邊友好似如夢初醒咁記起疫情又再升溫,港股今早創四個半月高位後回軟,恒指半日倒跌。恒指高開208點,半日最高見26662點,升211點創逾四個半月高,之後回吐,曾倒跌82點,見26369點半日低。恒指中午收報26403點,跌48點;國企指數報10642點,升88點;恒生科技指數半日升0.9%,報8067點,重上8000大關兼跑贏大市。
疫情升溫資金又從舊經濟股流出,友邦(01299)半日跌3.7%,藥明生物(02269)拆細後暫以2963進行買賣,半日腳軟跌3.4%。疫情再升溫,香港或內地及澳門要暢通無阻通關遙遙無期,濠賭股再受壓,兩隻藍籌博彩股金沙中國(01928)跟銀娛(00027)半日跌4.5%,其他濠賭股同樣偏軟。資金從傳統股回流至科技股,騰訊(00700)半日升0.6%,阿里(09988)落後咗個幾兩個星期,今日半場升4.4%,不過相對京東(09618)仍然輸緊幾條街。而疫情升溫,對京東健康招股反而有利,其業務都係有宅經濟概念,招股時應該市場會受落。將會明日公布業績嘅小米(01810),半日升逾5%,留意又係績前炒上,小米步京東後塵,即使交出靚仔成績表,續後好消息出貨要捱沽。
呢幾日疫情持升溫,呢個月唔單止多咗好多源頭不明本地個案,呢兩日仲要爆咗個跳舞群組出嚟,當中唔少有錢闊太中招,再次提醒大家,病毒唔識分貧富貴賤,所以要提高警覺,防疫一刻都唔可以鬆懈。之前阿Man講咗N咁多次,咪見啲傳統股做返好少少就亂咁衝,皆因疫情未知幾時過,疫苗要量產亦需幾個月,經濟要回復疫情前仲有漫漫長路,唔好見啲傳統股升些少又想追貨。今日地產股又死過,皆因疫情升溫下,防疫措施隨時再收緊,況且消費者消費模式因為疫情改變習慣,由線下轉線上,實體店只會愈嚟愈少,收租佬要回復過往風光日子似乎無乜可能。九置(01997)跌3.3%;領展(00823)跌2.2%;新地(00016)跌3.3%。
零售股當然亦要捱沽,不過宅經濟概念又落鑊,上周五阿Man叫追入港視(01137),半日再升4.4%,隨住確診數字再攀升,港視有望創新高。阿Man有貨一於坐定定等見新高,雖然發疫情財係唔會開心,但自己炒贏股票,總好過中咗招等政府派五千蚊救濟。
麥狄文
(徐狄怡‧證監會持牌人)