【盤房來料】批股完唔死必再有後着

拜登就職典禮風平浪靜，安然過渡，順利成為美國總統，隔晚美國為咗新總統贈興，三大指數創新高，美股繼續欣欣向榮，再加上內地A股做好，港股順利衝破三萬大關。恒指低開10點，報29951，早段走勢反覆，一度倒跌149點，低見29812半日低位。不過，A股發力，港股掉頭回升，最多升173點，高見30135，創2019年4月17日逾21個月高位，之後升幅縮水，又曾短暫倒跌，最終恒指半日報收30012，升49點；國指中午報11947，微跌1點；恒科指跌32點，報收9853。

藍籌股個別發展，港交所(00388)半日升2.1%，友邦(01299)跌、大笨象(00005)升，制裁股中移動(00941)、中海油(00883)及小米(01810)早兩日畀北水掃到甩轆，今日抖抖氣，中移動持平，中海油跟小米分別跌1.5%及3%，小米更更成半日表現最差藍籌股。科技股亦各行各路，騰訊(00700)跟京東(09618)獲美國女股神Cathie Wood 旗下基金增持，支持股價雙雙創新高，騰訊更曾高見700大關，半日騰訊升1.7%，京東更勁升2.7%。美團(03690)無女股神關照一樣創新高378.6元，唔少大行目標價400樓上，半日升1%，有貨梗係坐定定，let the profit run。

馬雲噚日終於露面，係螞蟻上市難產後首度亮相，帶動股價尋日急升，今日半場回吐2.7%，阿里唔企穩260都有啲棘手，JTMX已先後創新高，阿里卻一直落後，唔知幾時先肯發力。但長線嚟講阿里仍然值得持有，但相對京東，阿里估值唔算平。今日Saas及雲計算股見回吐，破頂後嘅明源雲(00909)半日跌近2%，不過只要明源雲仍守於前頂54之上，有貨可以繼續坐。

物管股見沽壓，不過阿Man低好嘅融創服務(01516)回吐壓力唔算大，半日跌幅唔夠1%，只要股價守住24元，阿Man會繼續持有。不過其他物管股閒閒地跌2%以上，永升(01995)半日跌近6%，暫時喺10日線爭持。
比亞迪(01211)宣布配售1.33億股新股，每股配售價225元，集資約299.25億元，配售價較上日收市價折讓7.8%；股價早段曾跌3.3%，其後倒升，半日倒升3.2%收市，反映配股已入強中手，再一次引證配股不死，必有後着嘅硬道理。

麥狄文

(徐狄怡‧證監會持牌人)