【盤房來料】港股增交易印花稅超級趕客

隔晚美股有鮑爺派定心丸，早段急跌後，收市前收復大部份失地，但港股就相反，財爺公布財案個市就一路插水，人家美國庫房空虛，國債高企下，仍計劃快推1.9萬億美元刺激經濟方案，但香港就喺庫房水浸，財政狀況雄厚嘅情況下，大大縮減派糖，硬係要慳住個荷包，市場失望下，港股高開低走，恒指更一度跌逾800點，可見大家對呢份budget有幾失望。

本來大家期望今年再派錢，以舒緩經濟喺疫情下陷入衰退嘅困境，但偏偏財爺就改派電子消費券，講真大把人失業或開工不足，仲邊有心情消費，呢粒糖可以話係食之無味，棄之可惜。而寬減薪俸稅上限由舊年2萬縮水至1萬，中產見到唔開胃。其他支助補貼都縮水，總之一句講晒，人哋派錢谷經濟，香港就把口話谷經濟，行動上係無助經濟復甦。

對個股市最大衝擊當然係加印花稅，宣佈股票印花稅率由現時買賣雙方按交易金額各付0.1%，增至0.13%。呢個動作完全違反推動港股維持國際金融中心地位，喺全球交易所競爭與日俱增嘅情況下，唔減印花稅仲要加，完全係倒行逆思，午後恒指應該再次失守三萬大關。

寫到呢度，阿Man真係覺得好好好嬲，股票交易印花稅由0.1%大幅增加三成至0.13%，何止係無助香港國際金融中心地位，完全係倒退行為，喺咁嘅原因下，今日下半場股市可以熄機唔使睇，要等市場消化呢個壞消息。暫時按兵不動，等呢個消息冷卻，反彈再決定點執一執個倉。

麥狄文

(徐狄怡‧證監會持牌人)