【盤房來料】周末前爭相減磅人踩人

美國10年期國債孳息急升至一年高位，突破1.6厘水平，誘使部份資金由股市流至債市，美股急跌，納指更跌3.5%，科技巨企顯著回落，拖累港股喺本月最後一個交易日再度下挫。恒指低開662點，開市後曾跌927點，見29147點半日低位，為2月4日以嚟最低，其後跌幅曾收窄至494點，見29579點半日高位，但中午收市前沽壓再現。恒指中午報收29342點，跌731點；國指收報11404點，跌312點；恒科指重創4.6%，跌440點，收報9056點。半日下跌股份比例達八成，反映跌勢其為全面，但暫時未知呢輪調整浪見底未，阿Man就預計喺50日線(28590)會有支持，而唔少重磅科技股，現價亦已相當接近50日線。

藍籌方面，中生製藥(01177)近日見北水流入，支持股價今日逆市再升0.6%，係今日表現最好嘅藍籌股，其他重磅藍籌股大部份無運行，港交所(00388)半日再跌近半成，噚日反彈無佢份，今日插水佢繼續打冷震。科技股跌勢未止，噚日反彈已無乜力，今日再踩多腳，單係ATMX已拖低大市295點，騰訊(00700)半日跌2.7%已算最強，小米(01810)、美團(03690)跟阿里(09988)全部跌超過4%。不過阿Man對呢批高增長股仍有信心，雖然呢一轉深度回調幅度甚為嚇人，但反而畀咗一啲一直未有貨嘅缸邊友一個建倉機會，尤其係阿里近日嘅消息反映，阿爺已原諒馬雲失言嘅污點，股價仲要跌至250日線下方，實在係收集好機會。至於騰訊跟美團，50日線附近亦可以分段買入，雖然有人認為美團估值離地，但內地公私募基金仍然睇好美團前景，並預期美團市值可高見四萬億，即係較現價仍有一倍上升空間。至於小米近日表現較令人失望，同佢已被列入制裁名單當然有關係，不過小米3月公布業績，只要業績交到功課，屆時資金又會重投其懷抱。

內房跟物管股昨日急升後，今早表現唔差，唔少股份仍逆市走強，可能係見北水噚日積極掃貨，估計呢一輪北水將持續流入呢個板塊。而藍光嘉寶(02606)獲碧服(06098)洽控股權，復牌飆20.5%，碧服跌1.1%，現價較收購價仍有水位，但留意收購成功與否仍有變數，有貨先食糊亦無壞。

今日周五相信沽壓喺收市前都難以消除，尤其唔少炒家喺周末前夕唔願買貨，為咗控制風險，更會選擇減磅離場。若然缸邊友只有現金倉無借孖展，無謂跟啲無持貨能力嘅炒鬼一齊爭相沽貨人踩人，即使想減倉都等反彈，今日又係另一個熄機唔睇嘅日子，望住報價機只有愈望愈擔心。

麥狄文

(徐狄怡‧證監會持牌人)