【盤房來料】汽車股需發展多元新能源車方有運行

上周美股表現理想，總結一周，道指、標指、納指分別累升1.95%、2.71%、3.12%。但係港股就完全跟唔上美股嘅步伐，主要係港匯疲弱，港股喺缺水嘅情況下，毫無起色，缸邊友更憂慮內地收水，以及加強監管科網龍頭，中港兩地股市反覆向下，恒指上周跌239點後，今早延續上周跌勢。

美股道指跟標指齊上收市新高，恒指高開93點報28791點，已經係半日高位，一度重返20日線(28693)，但開市即掉頭，廿日線得以復失，更加穿埋10日線(28514點)，一度跌424點，見28274點，為3月29日以嚟新低，剛剛喺100日線(28194點)上面有支持。恒指中午報收28417點，跌281點；國指報收10865點，跌111點；恒科指則跌133點，報8172點。

藍籌股個別發展，友邦(01299)跟大笨象(00005)分別跌2.1%及1.2%； 內地金融股同樣無運行，建行(00939)跌逾1%。港交所(00388)亦跌1.2%，呢期港股成交縮水，加上已經個幾月時間死蛇爛鱔咁款，新股上市呢期亦唔見得有幾受歡迎，自從快手(0124)將新股熱潮推上頂峰之後，市場對新股熱情急速冷卻，而完成集資嘅中企，亦要將資金調回內地，令港匯疲弱，喺再無新資金流入下，港股無運行亦正常。不過龍湖(00960)跟安踏(02020)則逆市升逾2%，中海油(00883)升1.3%。

阿里(09988)終於叻返次，半日逆市升7.2%，諷刺嘅係集團因涉壟斷而被內地罰款逾182億人仔，更需要接受整改，未來三年集團仍然要市監總局提交自查合規報告，不過有關罰款影響可控，以阿里截至2020年底止嘅現金、現金等價物和短期投資金額為4560億元人仔，對其財務唔會有乜嘢實質影響，而業務模式預期亦唔會有重大改變。正因為被阿爺打壓嘅陰霾已消失，喺不明朗因素掃除下，阿里反而吐氣揚眉。

反而市場擔心阿爺向其他科網巨企埋手，美團(03690)挫6.2%；騰訊(00700)跌1.8%；百度(09888)跌3.7%；京東(09618)跌3.6%。估計呢期呢堆股份都有得震，冇得瞓，但有阿里珠玉在前，可能畀阿爺罰一罰，對呢堆科網巨企係好事。只不過唔係間間公司都有阿里咁雄厚嘅財力，罰成二百億港紙亦可以眼都唔眨，估計上述呢幾間科網巨企，就只有騰訊有咁嘅財力。

汽車股今日表現亦疲弱，有內地傳媒報道，吉利(00175)等13間汽車廠被約談，吉利半日跌近7%，成為最大跌幅藍籌。其他汽車股亦腳軟，加上呢期市場講緊以氫代電，走得最前嘅國際大企業家，已開始研究氫氣車，睇嚟各大汽車企業都要向呢個方向研究一下，單靠發展電車業務，已唔能夠滿足市場對新能源汽車發展嘅要求。多元發展新能源汽車，從電能到氫能，先至係未來汽車企業靠譜嘅發展方向。

麥狄文

(徐狄怡‧證監會持牌人)