【盤房來料】港股日升日跌 成交萎縮極度趕客

隔晚美國公布7月CPI，終於見頂回落，市場預期加息步伐放緩，甚至估計明年開始掉頭減息，美股急升，三大指數向上，道指升535點；標指跟納指則升逾2%，分別升87點及360點。標指升穿4200阻力，納指亦已破位，挾到淡友懷疑人生，熊市反彈嘅力度，往往可以令人有錯覺牛市重臨。美股近日嘅強勢，主要係市場資金充裕，市場risk on 情緒高漲，美股暫時都係易升難跌。港股就繼續反覆，仍處於日升日跌嘅迷茫狀況。恒指過去三日跌近600點後，今早反彈近400點，但恒指仍未收復10天線(19977)及二萬大關。

恒指高開229點，升幅一度收窄至179點，見19789半日低位，不過A股抽高，而深創科升勢更凌厲，半日升2%，帶動港股發力升幅擴大，一度升391點，見20002，但此關得而復失，未能企穩。恒指半日升348點，報19959；國指升128點，報6772；恒科指升113點，收4287。半日成交又縮水到得返435.71億元，升幾百點成交又縮水，見到真係無言。

藍籌股普遍造好，今日公布業績嘅中移動(00941)，績前已炒咗幾日，難得噚日跌市仍能逆市走強，今日半日再升0.4%。大笨象(00005)半日升0.6%，友邦(01299)半日升1.5%。ATMJ半日全部有得升，但京東(09618)明顯跑輸，早段逆市下跌，至半日升0.4%；美團(03690)、阿里(09988)跟騰訊(00700)分別升2.4%、2.9%及1.4%。至於噚日收市後公布業績嘅創科(00669)絕地反擊，中期業績多賺一成，半日升10.5%，成為今日表現最好藍籌股。至於噚日急挫16%嘅龍湖(00960)，雖然已澄清未有任何商業票據違約，更揚言會提早贖回部份票據，但半日僅反彈4.5%；再睇埋中海外(00688)半日逆市跌1.1%，可見市場對內房股信心已盪然無存。

手機設備股今日表現唔錯，被稱為「最強蘋果分析師」的天風國際證券分析師郭明錤估計，iPhone 14系列平均漲價15%，手機股獲追捧。舜宇(02382)半日升6.5%，丘鈦(01478)升幅更達13.6%，其他手設股升幅由1%至7.7%不等。生科股半日回勇，噚日無厘頭跌一成嘅藥明生物(02269)，半日回升4.6%，重上70元水平；其他生科股普遍向上，較早前公布以溢價配股引入戰略合作夥伴嘅信達生物(01801)，半日更升7.1%。

其實港股升升跌跌，有波幅，冇升幅，一直未走出缺水困局，成交額持續萎縮，已極度趕客，唔少缸邊友已被港股悶到離場，港股一日未能解決缺水問題都難有作為。

麥狄文
(徐狄怡‧證監會持牌人)