【盤房來料】港股能守廿日及五十日線死唔去

上周五美股半日市，三大指數個別發展，市場等待周末公布嘅Black Friday數據，市況較為淡靜，不過美匯指數略為回升下，人民幣受壓，離岸人民幣兌美元今早貶逾500點子。可能阿爺都知人民幣受壓下，放水都只能有限度，所以人行周末只係宣布下調存款準備金0.25個百分點，預期可釋放5000億元新資金，較市場預期少。最大鑊係內地疫情升溫，加上長期抗疫兼封城封區，令部份地區出現反抗封控示威，港股今早裂口低開，一度失守萬七大關。

恒指低開573點，其後跌幅一度擴大至739點，見16833半日低位，其後萬七關失而復得，跌幅收窄至282點，見17291半日高位。中午恒指報收17225點，跌348點；國指跌129點，報收5841；恒科指跌79點，報收3420。半日成交額略見回升至707億元，早段見低位有買盤跟進，個市又未必死得晒。目前20日線升至17051，而50日線則回落至16961，今日20日線升穿50日線，出現第二個黃金交叉，只要仍守穩於呢兩條線之一，後市又未必太曳。

藍籌股偏軟，油價已連跌三個星期，三桶油腳軟，跌幅接近2%。至於AMTJ，美團(03690)交出一份好過預期嘅業績，公司提早喺第三季扭虧為盈，本來應該今日股價有唔錯表現，無奈大市整體低開，美團亦低開129元，最低見過128.5元，但其後大市跌幅收窄，美團亦拗腰倒升，半日報收137.6，逆市升0.7%。騰訊(00700)一度低見259元，其後跌幅收窄，半日跌1.8%，報收268元。不過內地疫情封控下，或影響物流，兩電商股京東(09618)跟阿里(09988)難免銷售有影響，半日分別跌4.2%及3.5%，分別報收190.2元及72.1元。金融類股份半日走軟，友邦(01299)跟平保(02318)分別跌3.7%及4.9%；大笨象(00005)半日跌0.8%算係硬淨。

內房股跟物管股上周熱炒，但人行放水幅度較預期少，加上內地疫情升溫下，多地出現反抗封控示威，內房股跟物管股再現沽壓。碧服(06098)半日跌9.2%，成為表現最差藍籌股。其他內房跟物管股普遍跌逾半成。雖然內銀已放水救內房，但暫時只係治標，未能治本，內銀股救內房，其實都係救自己，內房整條產業鏈能否翻生，最終都係要睇返內房銷售數字，整個房地產市道回暖，重回正軌，內房股先叫真正脫險。

澳門政府公布現有澳門六家賭場運營商獲續牌，不明朗因素消除，若非今早大市整體插水低開，濠賭股都唔會先低後高，而係高開高走。本來永利澳門(01128)被視為不獲續牌嘅大熱門，但如今都係雲頂未能躋身澳門賭業，永利鬆一口氣，半日急升15.8%，其他濠賭股升幅最少係銀娛(00027)只升0.5%，其他濠賭股唔失禮，升幅由5%至12%不等。

麥狄文
(徐狄怡‧證監會持牌人)