登入 直接訂購 如何使用?

【盤房來料】阿里回歸 港交所可保集資一哥地位

有關中美貿易談判進展嘅消息日日新鮮,噚日先話中美願意喺首階段協議簽署後,雙方同步撤銷關稅,以利續後談判得以順利進行。因為呢個消息,隔晚港股午後倒升,期指更一度逼近二萬八大關。不過剛剛又傳出白宮內部強列反對撤對華關稅,加上港股已連升6日,而今日又係周末前夕,今早有缸邊友趁高獲利,港股半日跌逾百點。

恒指高開47點報27894,已經係半日高位,可惜未有升穿昨日高位27900點,其後有獲利盤沽貨,即使A股上升,港股亦無福消受。大市掉頭下跌,恒指最多跌174點,低見27673,不過支持位好似又稍為推高至27600水平,大市跌幅收窄,最終恒指半日收報27726,跌121點;國企指數中午收報10913,跌22點。

話咗騰訊(00700)一日上唔番340元,340元至350元之間阻力甚力,睇怕要捱到下周季績公布先有轉機,但家下係危係機仍未知,只係睇倒騰訊呢期都係跑輸大市。其他重磅藍籌股亦受壓,不過講真沽壓唔算嚴重,半日跌幅有限。

唔知大家有無留意到,近日每當個市回氣嘅時候,汽車股總係逆市跑出,完全唔知咩玩法。今日整個板塊均見逆市上升,但阿Man長氣都要提醒大家,呢個板塊暫時未算得上復活,只不過銷售數未有改善,但實際上仍存隱憂。只不過技術上面,整個板塊走勢都已轉強係事實,值唔值得追入,阿Man仍有保留,反正錯過咗的話,寧願睇番內險股。

MSCI經過檢討之下,已決定納入A股繼續擴容,內地股市做好,估計A股今年餘下時間走勢可回勇,內險股料可直接受惠。不過留意表現較為落後嘅中國太保(02601),集團喺財險保費收少嚟睇,增長勢頭仍然強勁,現價估計又唔算高,值得睇高一線。

阿里巴巴回歸港股已落實,由於係第二上市關係,可以省卻路演呢一部份,其實睇番阿里巴巴喺過去大半年,走勢一直跑贏騰訊,家下阿里回歸港股,料可吸引內地資金追捧。雖然阿里集資額略為縮水,但繼百威亞太(01876)之後,再有百億美元集資額嘅阿里巴巴回流,港交所(00388)今年應再蟬聯全球新股集資額冠軍,港交所股價今日逆市上升亦有其道理,料可向260元首個目標進發,一旦升破260元,下一目標自然係向280元較大阻力位挑戰。

麥狄文
(徐狄怡‧證監會持牌人)

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。