登入 直接訂購 如何使用?

【盤房來料】貿談有進展 科技手設股又落鑊

侵侵又放風話中美貿易談判好好傾,仲話關稅方面,可能有特別消息,華爾街聽到梗興奮,心諗唔通美國放過中國,12月15日又唔加關稅進,甚至之前收緊嗰啲都減少或撤銷,令到美股隔晚由跌轉升。不過咁喎,財長話談判無死線,呢句嘢真係睇市場點演釋,無死線即係唔理12月15日嘅加徵關稅限期,咁可以係慢慢傾又得,快快搞掂又得,總之咪彈性囉。

恒指高開128點,報26345點,開市後升幅一度收窄至92點,見半日低位26309點,其後升幅再度擴大至258點,見過半日高位26475點,但始終26500至26600點阻力甚大,家下連26500個影都冇見,港股市底同美股都難以相提並論。半日恒指報收26396點,升179點;國指則升55點,半日報收10377點。

藍籌股中旺旺(00151)創超過半年高位,半日升2.8%。而銀娛(00027)開市前有大手成交,半日升逾2%,雖然阿Man對濠賭股興趣不大,始終受經濟大氣候影響,不過喺中美關係未完全正常化前,澳門賭牌又逼近續牌期限,無美資參與嘅銀娛,喺成功續牌方面,當然較金沙中國(01928)、美高梅(02282)及永利(01128)等有外資參與嘅集團更有勝算。

至於其他重磅股個別發展,中生製藥(01177)反彈,半日升1.9%,總之一日仲守住10元,此股仍值得保留。港鐵(00066)昨日公布營運數據,社會運動拖累集團全年少賺16億元,不過上周阿Man曾於其他平台發文,表示港鐵財務穩健,現價低殘,喺42元至44元值得吸納。

中美貿易談判正常發展,科網股繼續落鑊,而之前已有大行表示預期明年5G上線後,或現換機潮,預期明年蘋果手機出貨量有增長,今日蘋概股炒高。瑞聲(02018)半日升逾8%,舜宇(02382)亦升逾5%,其他手設股全部走高。除咗手設股之外,晶片股亦有追捧,中芯(00981)及華虹(01347),尤其後者升勢凌厲。其他輕資產新經濟股亦見資金流入,呢個板塊似乎愈炒愈起勁。

至於司長老公股安樂(01977),噚日因涉違競爭法,即係工程圍標接受調查,股價今早復牌半日跌8.7%。不過講真呢隻股由上市至今,早初市場所放棄,就算跌到一仆一碌,慘過司長喺倫敦仆親,對一般缸邊友嚟講都無乜影響。

麥狄文
(徐狄怡‧證監會持牌人)

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。