登入 直接訂購 如何使用?

【盤房來料】港股回復升勢言之尚早

美股隔晚個別發展,三大指數創即市新高,但道指最終抹去升幅,而標指跟納指則再創收市新高。港股就跟隨美股繼續反彈,今早成功收復所有移動平均線,升至兩個幾星期高位。恒指今早高開133點,成功重上20日線(27605),雖然升幅曾收窄至30點,見半日低位27614點,其後再現上升動力,半日最多升210點,見27794點半日高位。中午恒指報收27774點,成功企穩20日線(27691)、50日線(27602)及250日線(27687)之上。國指則報收10868點,升59點。

習大大表示中國有能力戰勝疫情,市場對武漢肺炎疫情憂慮略為緩和,加上資金泛濫,一街都係低息平錢,資金湧入股市亦屬正常。其實目前全球央行傾向放水,長期畸形低息環境,令資金侷住買股,而美國經濟表現唔錯,美股接連創新高,估值高企都仲叫有啲理據,但港股喺刻下嘅經濟環境下,港股同可以逼近二萬八大關都算係咁,可以話股市完全唔反映經濟實況。

今日港股成功回補過年後嘅下跌裂口,大市係咪就此完成調整回復升勢,暫時言之尚早,本來阿Man認為今個星期大市都係玩上落,移動區間26500至27500之間,家下恒指成功收復全部移動平均線,只要呢兩三日守穩,短線挑戰二萬八都無走雞。

喺大市碌落嚟期間,阿Man一直表示趁新經濟股回調要吸納,尤其係三大巨頭AMT,三股今日表現唔錯,就算阿里巴(09988)暫時未獲納入港股通,都守得住210元,半日反彈1.2%,話咗210元樓下低吸無乜點錯。至於騰訊(00700)成功升穿馬化騰價同南非價,短線繼續向好,股價下一阻力為415元至420元,集團收入唔受疫情影響,大行又繼續睇好,加上阿里暫時入唔倒港股通,間接令資金流番入騰訊。至於美團(03690)擔心外送業務或因為合作餐飲機構因疫情倒閉,但長線睇唔應該太差,都係逢低吸納無乜錯。

至於上兩星期跌到一仆一碌嘅濠賭股,今日反彈,留意係以全年計,今年濠賭股收入有機會大幅倒退兩成,疫情影響如何仍屬未知數,博反彈都係見好收,一旦疫情持續,濠賭股點都係重傷。

講真港股彈到二萬八係咪就大翻身,阿Man暫時有保留,反而逼近二萬八,之前未有減磅嘅,或者要把握機會減減磅,追貨呢現價水位有限,寧願等二萬八確認轉勢再決定。

麥狄文
(徐狄怡‧證監會持牌人)

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。