登入 直接訂購 如何使用?

【盤房來料】大笨象暫停回購失支持

話咗二萬八關企唔穩,港股都係維持上落市格局,隔晚美股假期休市,本來港股無乜方向,不過美國計劃對中國發起新一輪技術限制,研究禁止中國使用美國晶片製造設備,以免中國取得關鍵半導體技術。另一方面,蘋果公司發盈警,至受到武漢肺炎疫情打擊,導致iPhone供應受阻及中國需求下降,截至3月底止季度收益,可能不符預期。

因為呢兩個消息,道指期貨已見腳軟,恒指今早亦隨之低開,開市跌193點,其後略為收窄跌幅至188點,見過27771點半日高位。不過A股向下令港股沽壓增加,恒指連失50日(27704)及250日線(27680)嘅匯聚區,最多跌405點,見27554點半日低位。恒指中午報收27581點,跌378點;國指則報收10813點,半日跌144點。

單係蘋果公司個盈警,就嚇到啲手機設備打晒冷震,一對手設股藍籌孖寶舜宇(02382)同瑞聲(02018)走晒樣,半日跌逾4%,噚日升幾多,今日嘔突。除咗手設股之外,其他科技股亦捱沽,以晶片股同硬件股表現較差,中芯國際(00981)盤中一度跌一成,半日成交額更放大至29.67億元,反映沽壓頗為沉重,半日收市跌7.4%都咪話唔傷,睇嚟短線有幾會回試14元,想買貨嘅完全唔使心急。

今日大家比較關注嘅係大笨象(00005)業績,截至去年底全年列賬基準除稅前利潤133.47億美元,按年下跌32.9%。期內,經調整除稅前利潤222.12億美元,按年升4.86%。呢份業績差過預期,估計午後跌幅將擴大。其實業績唔好都係意料中事,不過集團表示未來兩年要進行大規模重組,所以今明兩年將暫停股份回購,至2022年恢復。無咗回購呢個支持股價因素,大笨象今次GG了,股價之前未能突破60元都係濕滯,睇怕今次58元支持位都危危地,話唔定有機會落番56元。

另一個捱沽版塊係內房股,美滙指數偏強,或影響人民幣走勢,加上中國放水及稍後要提升出口,較弱嘅人民幣滙價先有利,但就令對人民幣走勢較敏感嘅股份受壓。內房股全線下跌,講嚟講去呢個板塊都係睇住人民幣走勢做人。再加埋要減價賣樓,令沽壓進一步增加。

澳門宣布周四凌晨賭場可恢復營業,但唔見到濠賭股一定受惠,雖然澳門係防疫上做得唔錯,可惜內地多個城市仍然處於封城狀態,就算賭場重開,少咗內地班豪客,賭場一樣拍烏蠅,所以對於賭場恢復營業,呢個板塊亦唔會即時翻生。

麥狄文
(徐狄怡‧證監會持牌人)

 

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。