登入 直接訂購 如何使用?

【盤房來料】未來恒指新貴逢回吐吸納

一枝仲係處於首階段臨床試驗嘅疫苗,威力都幾大,再加埋鮑爺重申,聯儲局將會承諾採取一切可行嘅工具去維持市場正常運作,兩個利好消息支持美股顯著上升,道指跟標指升逾3%,納指則升逾2%。美股做好帶動港股隔晩喺ADR及夜期同樣做好,港股今早順利收復多條移動平均線。

恒指裂口高開554點,開市已即收復50天線(23930點)、20天線(24105點)及10天線(24130點),高市後最多升617點,見24552點超過一周高位,但24500點有一定阻力,其後升勢回順,升幅收窄至379點,見半日低位24314點。恒指中午報收24363點,升428點;國指則升148點,半日報收9875點。

藍籌股除咗中移動(00941)同萬洲(00288)半日逆市下跌外,其他藍籌股全線上升,不過阿Man都係鍾情新經濟股同輕資產股,藍籌大部份屬舊經濟股,好難引起阿Man興趣。其實恒生指數遠較美股落後其中一個原因,係舊經濟股,尤其金融及地產股比例過重,但隨住時代變遷,新經濟企業未來對GDP貢獻將愈嚟愈大,恒指加重新經濟股,尤其科網股比例係必需嘅。

恒指服務公司公布有關W股及第二上市股份有關納入恒指及揩數成份股諮詢總結,由於逾九成回應支持相關建議,以上兩類股份最快可於下次季度檢討,即8月份可獲納入為指數成份股。雖然佔比唔好可以多過8%,但今次季度檢討,恒指成份股未有作出任何變動,唔排除係為8月納入小米(01810)、美團(03690)或阿里巴巴(09988)而鋪路。三隻未來藍籌新貴今日有資金流入,未獲納入先興奮,睇嚟炒加入恒指成份股憧憬可以繼續熱炒,三股呢段時間可以逢回吐吸納。

美國陸續解封不同州份及城市,市場開始睇番出口股,資金流入相關股份。不過相關股份未必全部係好嘢,好似新秀麗(01910)雖然獲美國資金增持,刺激股價半日升15%,但以業務嚟講,真係完全唔吸引,況且其產品屬於耐用品,好難長期維持高增長。睇番此股上市至今,走勢似乎向下,由十幾蚊跌至6至8元水平橫行,股價走勢一直未見起色,上面蟹貨多到不得了,就算基金增持數量亦有限,好難支持股價一升再升。

麥狄文
(徐狄怡‧證監會持牌人)

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。