登入 直接訂購 如何使用?

【盤房來料】港股抖氣但仍維持反覆向上格局

美國示威騷亂開始平息,而環球經濟活動陸續重啟,經濟有望逐步恢復,就業市場未如預期咁惡劣,重啟經濟似乎初見成效。美股繼續升,市場樂觀情緒高漲,資金繼續risk on,令避險資產黃金價格亦一度跌穿1700美元。即使美國運輸部宣布,將由6月16日起暫停中國的航空公司飛往美國嘅航班,中美再度交惡,中美關係可能再惡化,市場仍無動於衷。

港股跟隨美股高開,不過噚日都講過港股已經連續三個裂口高開,今日仲要整多個裂口,高開318點,報24643點已經係半日高位,其後升幅一直收窄,高開低走,一度倒跌121點,見24204點半日低位。恒指中午報收24298點,跌27點;國指則報收9943點,跌24點,萬點大關一瞬即逝。

藍籌重磅股個別發展,港交所(00388)升至295.4元高位後回吐,半日跌0.3%,但仍企穩290元樓上。騰訊(00700)已經三連陰,半日微跌0.2%,但440呢個阻力位睇嚟暫時無法突破。不過個市由上周一低位計彈咗超過二千點,再上升嘅動力已經減弱,除非炒起埋啲內銀股,否則個市要更上一層樓似乎有啲難度,但唔排除港股要向上挑戰阻力,呢堆老鬼亦要幫手出一分力。本地地產股彈唔彈得多,今日個市已缺乏動力再上,本地地產股自然又回頭,不過跌幅唔算大,否則個市連24200都失守。

ATM嘅騰訊暫時乏力再上,阿里巴巴(09988)挑戰210元阻力後未見一氣呵成,又係高開完唔再follow,只有美團(03690)繼續尋頂,今早再創164元上市新高。美團嘅升勢令唔少缸邊友一跌眼鏡,再一次引證處於升勢中嘅股份係唔使急住落車,唯一方法係不斷提高止賺位死坐。

地攤經濟概念令阿Man摸不著頭腦,工人失業鼓勵人民擺地攤,真係要有相當智慧先明白。連啤酒股都話係地攤經濟概念股似乎更加無厘頭,但青啤(00168)A股已創新高,H股亦炒上超過五年高位,潤啤(00291)則升2.8%,同樣處於年內高位。而「地攤經濟」概念股五菱汽車(00305)連日炒上,半日再升逾五成,講真呢啲概念股唔識玩亦唔敢玩。睇番轉頭雄安概念亦曾一時無兩,但依家相關概念股都無晒影,參與炒作真係要動作夠快,有唔對路最緊要識得跳車。

暫時港股喺北水加持下持續反彈,雖然今日開始要抖抖氣,但技術走勢上,恒指多條移平均線已收復,短期仍有動力再向24800巨大阻力位挑戰。至於短線支持位喺23800點,只要此關未失守,喺市場樂觀情緒推動下,港股暫時維持反覆向上格局。

麥狄文
(徐狄怡‧證監會持牌人)

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。