登入 直接訂購 如何使用?

【盤房來料】死坐傳統股浪費子彈兼錯失機會

美股隔晚先低後高,但始終周三跌勢較為顯著,港股今早低開,失守100日線(24723)。恒指低開833點,一度跌187點,見24593點半日低位,之後跌幅曾收窄至25點,見半日高位24756點,可惜100日線得而復失。恒指中午報收24640點,跌140點;國指跌40點,半日報收9895點。

美國參議院通過《香港自治法案》,法案仍須待美國眾議院表決通過,以及由侵侵簽署,才能生效成為法例。法案要求制裁有份落實「港版國安法」的官員,以及打壓香港示威者的警員等。雖然有關《香港自治法案》未生效,但已有消息指部份中國企業,包括中移動(00941)母公司,已被列為解放軍控制企業名單,未來或被美國制裁。中移動半日跌1.7%,加埋友邦(01299)半日跌1.9%,騰訊(00700)亦見回吐1.2%,幾隻重磅股跌逾1%嚟講,大市半日仲企到24600水平都算係咁。

醫藥股仍然有追捧,唔少股份包括信達生物(01801)、藥明生物(02269)、君實生物(01877)、康方生物(09926)、沛嘉醫療(09996)、微創醫療(00853)、平安好醫生(01833)和阿里健康(00241)全線創出上市新高,但當中嘅微創醫療(00853)半日倒跌,可能同呢兩日升勢較急,出現超買有關。不過呢個板塊維持強勢,有貨可以繼續持有。

雖然科網巨頭ATMX半日見回吐,但其他科技股今日繼續熱炒,升到唔識停嘅中芯國際(00981)再破頂,半日升3.5%,華虹(01347)則升5.6%。軟件股方面,金山軟件(03888)高處未算高,股價已連升10個交易日,今日再升2.4%。留意上海復旦(01385)同晶門(02878)呢啲龍尾股都追落後,講真呢兩隻股今日急升都好,始終仍處於長期低位,表現長期積弱,上面蟹貨唔少,唔建議追貨,隨時急升後又無影。手機設備股今日亦有資金追捧,舜宇(02382)有大行唱好,不過130元阻力唔細,唔係咁易突破。上周急升嘅國美(00493)半日回吐6.8%,黃光裕證實獲假釋,消息落實反而係沽貨套利時機。

睇嚟個市喺下周一結算前變化唔大,結算企喺二萬四水平之上,呢個六絕月唔算絕,反而唔少勢股破頂創新高,大市整體氣氛仍然唔錯,炒股唔炒市氛圍下,建議投資者集中火力炒新經濟股,傳統股繼續呆滯,無論浪費子彈,喪失機會成本。見到強勢股回吐,反而係撈貨好機會。

麥狄文
(徐狄怡‧證監會持牌人)

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。