登入 直接訂購 如何使用?

【盤房來料】新經濟股回氣快 切忌心急落車

美股升咗幾日,都要搵個藉口回吐一下,又冇其他消息同數據公布,唯有將個焦點放番去疫情,三大指數均見回吐,納指盤中創新高後倒跌。其實美國自重啟經濟活動後,疫情已再度爆發,美股都無乜理會過,只係隔晚回調要搵過理由去解釋。情況就如噚日港股上到接近26800高位,咁啱香港呢邊單日新增多個本地個案,都係用番呢個藉口回調,由高位落番去接近26000水平。

恒指今早高開102點,一度反彈324點,見26299點半日高位,其後再度考驗250日線(26081點),更失守26000關,倒跌125點,見25849點半日低位,目前喺二萬六水平爭持,恒指中午報收26063點,升87點;國指報升121點,半日報收10722點。

A股連升幾日後,今日反覆靠穩,半日仍維持升勢,港股自然回調得唔多。由26800水平回落至26000點都見支持,重磅藍籌股個別發展。港鐵(00066)上半年蝕4億,股價跌2.5%,睇嚟都無乜運行。至於侵侵已放晒風話好快會對中國及香港實施制裁,市場擔心美國向總部設於香港嘅銀行開刀,大笨象(00005)、恒生(00011)跟中銀香港(02388)齊齊腳軟。

阿Man噚日講過,科技股即使要抖氣,都唔會抖得耐,雖然傳統股近日有資金追落後,但整體升勢仍然由新經濟股主導。騰訊(00700)即使再畀CEO減持,但股價再創新高,半日升3.7%。而美團(03690)噚日回調至接近10日線又彈,今日走勢回勇,再創194.8元新高,半日再升4.5%。阿Man講咗小米(01810)成功突破13-14元巨型蟹貨區,好戲在後頭,今日重上15元再年內高位,向住16至17蚊目標出發。而阿Man之前推介過嘅微盟(02013)跟微創醫療(00853),一直叫坐定定,今日雙雙再破頂,科技股再搭醫療股,係穩操勝券嘅方程式。

連日金管局向市場注入港元,反映資金持續流入,睇嚟港股繼續大漲小回,初步支持位喺25800點,只要250日線稍作整固,港股呢個月要見二萬七應無難度。舊經濟股都係留意住內地券商股,而A股市場突破扭轉長期弱勢,除咗持A股重貨嘅內險股有運行,內銀股亦水漲船高,咁多隻內銀阿Man較睇好建行(00939),卒先破今年高位,只要企穩6.5樓上,股價坐七望八。

麥狄文
(徐狄怡‧證監會持牌人)

 

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。