登入 直接訂購 如何使用?

【盤房來料】科網股累積升幅巨大 合理回調反對後市有利

美股隔晚先高後低,市場除咗關注全球再爆發新一波疫情之外,中美關係趨愈緊張,尤其雙方互相制裁官員,而侵侵早前已表示,未有計劃跟中國再展開另一輪貿易談判。呢兩個因素本來已夠晒困擾,不過美國科技股一直漠視,隔晚納指再創新高,可惜高位有回吐壓力,原因係美國再踏入季度業績期,即使市場早有心理準備第二季度業績將反映疫情所帶來嘅衝擊,表現唔會好得去邊,但出嚟結果更曳嘅話,就係美股一個好好回調嘅藉口。隔晚納指出現穿頭破腳,走勢甚為難睇,拖累港股今日嘅科網股出現較大幅度調整。

恒指低開108點,報25663點已經係半日高位,其後跌幅擴大至517點,見半日低位25254點,失守10日線(25641點)。恒指中午報收25335點,跌436點;國指中午報收10365點,跌210點。

大型科網股全線回吐,新經濟股今日唔多精神,龍頭騰訊(00700)半日跌3.4%,不過有大行調升其目標價至610元,回調正好係上車好機會,現價穿咗10日線529元,下一個支持位暫時係515元,至於500元呢個係終極支持位,相信唔會穿。阿里巴巴(09988)插6.1%,完全回補上周四所遺下巨型上升裂口嘅同時,今日又出現一個下跌裂口,形態上出現島形頂,走勢係幾難睇,不過只要呢兩日上番240元樓上,亦唔會太差,始終阿里今年染藍已無懸念,急升後回調整固亦係好事。其他熱炒嘅科網股,阿Man都唔全部列出嚟,總之今日閒閒哋跌5%或以上,但相對呢批股份嘅累積升幅,回調幅度亦算合理。

汽車股早前因為內地疫情緩和後銷情理想,加上資金開始買入落後傳統股,整個板塊回升,而當中最強勁當然係以電動車為主嘅比亞迪(01211),但隔晚電動車一哥Tesla喺美國創新高後倒跌,比亞迪半日亦急跌8.5%。而吉利(00175)半日亦插6%,藍籌之中跑第尾。不過自4月份銷售數據反映,經過今次疫情,有負擔能力嘅內地民眾,都傾向自駕而減少搭公共交通工具,除咗汽車股外,不妨睇番啲4S汽車銷售代理。

至於澳門取消對內地居民隔離需求,濠賭股今早裂口高開,但十居其九都係高開低走,雖然呢個板塊已捱過最差時間,但收入未有耐回復疫情前水平,預期今年都係有波幅,冇升幅,高追制唔過。

麥狄文
(徐狄怡‧證監會持牌人)

 

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。