登入 直接訂購 如何使用?

【盤房來料】小騰訊微盟接近頸線夠值博

美國新一輪刺激經濟方案短期內公布,市場憧憬新經濟方案有助提振經濟,美股終止兩日跌勢,三大指數回升。截至上周五有128家標指公司公布了業績,其中81%好過分析師的預期,但標指成分股的整體收益較上年同期下降了40%以上,不過受疫情影響,市場已預期美企收入會縮水。與此同時,美藥廠Mondara研發肺炎疫苖進度理想,預期最快可以年底前推出市場廣泛應用。美股喺幾個利好因素支持下回升,納指更升逾1%,重上10及20日平均線。

至於港股跟隨美股反彈,恒指高開339點,報24942已屬半日高位,話咗25000點呢一關由之前支持變阻力,一開市升幅已縮水,升幅得番69點,見24673點半日低位,險守50日線(24647)。中午恒指報收24733,升129點;國企指數收報10158,升83點。

恒指科技股指數首日掛牌下跌,今日反彈半日反彈近200點,全靠騰訊(00700)半日升4.2%,公司計劃私有化美國上市搜狗,騰訊嘅升幅亦為恒指帶嚟122點貢獻,叫做抵銷另一重磅股大笨象(00005)插水近2%。阿Man已多次強調無謂死守大笨象,自年初其股價跌穿50元,阿Man已表現有貨要逃生,其後更宣布唔派息兼零回購,可以話正式宣布死亡,股價進一步失守40元,即使月初大市曾逼近二萬七水平,大, 笨象股價未能重返40水平之上,其勢之弱可見一班。

其他重磅藍籌股個別發展,同屬科指權重股嘅舜宇(02382)延續噚日升勢,今日再升逾2%。呢期新經濟股抖氣,資金流入傳統股板塊,內需股係其中一個傳統得嚟,表現唔算太差嘅板塊,蒙牛(02319)今日更成為升幅最大藍籌,半日升6%。

地緣政治風險持續升溫,金價連升六日,今早再創1981美元歷史新高,不過高位回調倒跌,今日創新高嘅金礦股及黃金ETF,全部開倒車。估計金價呢一輪升浪已完成,預期金價再向上挑戰2000美元之前,需要喺1950美元樓下整固,短線支持位1900元。

雖然新經濟股見回吐,但喺整固期間係一個搵位上車好機會,除咗ATMX四大天王係必選股,有小騰訊之稱嘅微盟(02013)現價亦有一定值博率,頸線喺10元水平,10.7樓下買,穿10元止蝕,都係拎最多7%出嚟博,上面先睇番11.23同11.5,10日及20日線之所在,能夠收復呢兩條線,衝破12元再創新高指日可待。

麥狄文
(徐狄怡‧證監會持牌人)

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。