登入 直接訂購 如何使用?

【盤房來料】中國如反制 美資背景濠賭股或不獲續牌

人家美股隔晚又做好,三大指數顯著上升,道指跟標指連升五日,納指更七連升,再創收市新高。美股做好係因為侵侵打算今明兩日內簽行政命令先通過延長補充失業保險、實施工資稅減免,因為未知國會兩黨何時能就新一輪刺激經濟方案達成協議。侵侵呢一着或者可推動兩黨加快協商,市場憧憬紓困方案或可短期內落實執行。同樣係行政命令,侵侵發出行政命令,將於45天後禁止所有國民與TikTok母公司字節跳動(ByteDance)以及微信(WeChat)母公司騰訊(00700)進行交易,封殺中國科企。呢一道行政命令就做瓜咗港股,皆因騰訊點名被針對,作為恒指權重股,騰訊有乜頭暈身慶,大市必受拖累。

恒指低開21點,一開市見24909點已經係半日高位,開市後跌幅擴大,再穿10日線(約24764)及50日線(約24823)滙聚區後愈跌愈急,盤中最多曾插762點,見24167點,創6月29日以來新低。不過100日線(約24257)失而復得。恒指中午收報24364點,跌566點;國指跌穿萬點大關,半日跌212點,報收9989點。恒生科技指數跌幅最大,盤中曾跌5.7%,收市報7221點,半日跌4.69%。

騰訊被點外封殺,股價一度急跌近一成,失守500大關,低見499.4,496.8剛好係50日線之所在,點都有支持,果然跌至該水平即反彈,中午跌收收窄至6.7%,但已拖低恒指209點。阿里巴巴(09988)及小米集團(01810)齊跌4.6%,分別跌至240元及15元支持位喘定。美團(03690)創新高後回吐3.2%;半日跌3.2%。中芯(00981)次季盈利增逾6倍,但料下季毛利率縮,半日回吐9%,阿Man噚日講咗,就算唔少大行仍睇好公司有國策扶持,但30元樓上嘅中芯絕對唔便宜,話咗打死唔會追。

A股今日走勢麻麻,內地券商股顯著回吐,即使有傳聞指中金(03908)為螞蟻喺香港及上海兩地上市嘅保薦人,亦難敵今日整個板塊跌勢,半日跌3.4%。其他券商股跌幅較。被人事變動及合併傳聞影響嘅中信建設(06066),即使已澄清但股價半日仍跌成。其他內地券商跌幅最低消費為4%。

濠賭股逆市向上,主要係澳門保安司司長黃少澤表示,有關與內地通關工作正有序進行中,不過阿Man都唔多睇好呢一個板塊今年內表現,過去幾個月賭收按年減少六七八成,預測濠賭收入要回復正常水平,講緊至少一年半載,加上中美關係惡劣,美國封殺中國科企,中國反制同樣可以封殺美企,唔為永利澳門(01128)及金沙中國(01928)續澳門賭牌,即係呢兩隻濠賭股要格外小心。

麥狄文
(徐狄怡‧證監會持牌人)

 

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。