登入 直接訂購 如何使用?

【盤房來料】靜待騰訊業績 暫時少做少錯

上周五美股個別發展,道指跟標指保持升勢,但納指創新高後倒跌,主要係市場憂慮美國點名針對科網巨企,向美國企業發出與相關公司交易嘅禁制令,不過都仲有45日時間,有乜嘢交易就要喺呢個半月之內搞掂。而一直跟TikTok母公司字節跳動洽談收購海外版TikTok嘅微軟,雙方仍然磋商中,有傳聞指Twitter亦有意收購TikTok美國業務,只不過Twitter同TikTok咁高咁大,可能冇咁嘅財力去完成收購,點計條數都係微軟機會大啲。另有消息指私募基金黑石集團(Blackstone)有興趣成為微軟嘅夥伴,一齊收購TikTok美國業務。

無論TikTok美國業務花落進家,交易都必須喺9月15日之前完成,否則TikTok喺美國將會被封殺。至於騰訊旗下嘅微信亦將被禁,不過有專家指若禁令涵蓋透過微信展開業務嘅美國企業,對部分美企嘅打擊可能高於騰訊(00700)本身,當然最終要睇禁令如何執行。美國大大小小企業品牌透過加入微信推出嘅「小程序」服務,希望就此促進交易,吸引更多中國消費者。而騰訊主要收入來源為遊戲,暫時美國未有提禁令或從應用程式商店下架,即使行到呢一步,騰訊遊戲收入來自美國市場低於1%,而來自美企使用微信「小程序」服務嘅收入,同樣微不足道,即係侵侵禁微信於美國使用,可以話對騰訊幾乎無影響。反而呢個禁令對個別依靠騰訊獲取更多流量嘅美企,所造成傷害或更大,好似沃爾瑪表示,透過微信呢個app,公司喺中國嘅交易數佔總交易超過三成。

呢個科網禁令係唔係美國搬起石頭砸自己腳仲未知,但喺香港上市嘅科網股就跌到一仆一碌。騰訊上周五一度急跌一成,收市跌5%,今日跌勢未止,半日再跌3.3%;阿里巴巴(09988)跌2.6%;小米(01810)跌1.4%;網易(09999)及京東(09618)跌3.3%及2.2%;只有美團(03690)逆市升1.4%。恒生科技指數明顯跑輸大市,半日跌2.8%。手機及晶片股同樣捱沽,瑞聲(02018)及中芯國際(00981)齊跌5.7%;比亞迪電子(00285)跌9.7%;舜宇(02382)跌3.3%;丘鈦科技(01478)跌3.8%;中興通訊(00763)跌2.4%。

美元反彈,金價回落,一度跌穿2020美元,金礦股及黃金ETF下跌。不過喺貨幣潛在貶值及通脹升溫下,黃金走勢都係大漲小回,只要金價守喺2000美元之上,短線回調反而係上車機會。過去一年阿Man一直推介SPDR黃金ETF(02840),不過家陣有FL二南方黃金ETF(07299),兩倍槓桿更具吸引力。

預期港股短線仍受中美關係所困擾,短線亦無乜炒上誘因,留意周三騰訊業績未知能否為大市沖喜,恒指服務公司季檢亦值得期待,暫時大市唔上唔落,叫做守住100日線(24264),一動不如一靜,呢兩日都係少做少錯。

麥狄文
(徐狄怡‧證監會持牌人)

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。