登入 直接訂購 如何使用?

【盤房來料】科技股止跌要靠騰訊業績沖喜

隔晚美股表現反覆,但科網股同新經濟股呢兩日明顯轉弱,幾隻科網巨企包括蘋果公司、亞馬遜同Facebook均跌逾2%,Netflix全日跌3.4%;晶片股跌勢亦顯著, AMD跌6.52%;英特爾跟Nvidia則挫跌2.82%。由於科技股喺過去一年跑贏大市,累計升幅更相當驚人,資金喺現水平計一計數,沽部份貨去鎖定利潤亦好合理。納指嘅跌勢蔓延至港股呢邊嘅科技股,恒生科技指數連日大幅調整,今早更失守7000點,中午收報6884點,跌244點,跌幅超過3%。而A股今早亦顯著下跌,拖累港股喺噚日勁彈後,升勢能持續。

恒指低開22點,開市無耐曾見24891半日高位,可惜沽盤又殺到,令恒指一度倒跌205點,見24685點半日低位,失守20日線(24871點)及50日線(24907點)滙聚區。,其後大市收復失地,止跌回升不足1點。恒指中午收報24842點,跌47點;國企指數報10088點,跌64點。

重磅藍籌股本地銀行股及濠賭股表現較佳,大笨象(00005)半日升3.5%,主要靠佢撐住個市,亦係表現最好成份股。旗下恒生(00011)亦升3.3%,渣打(02888)半日亦升近3%,只有中銀香港(02388)升幅不足1%,相對無乜力水。銀行股逆市升主係美債息率回升,十年跟兩年期美債息差擴闊。不過內銀股未能受惠,工行(01398)跟建行(00939)分別跌1.5%及1.2%。萬洲(00288)派完成績表見光死,畀大行唱淡調低目標價,股價半日跌近8%,成份股中跑第尾。澳門自由行9月23日全國解封,濠賭股承接噚日升勢,銀娛(00027)再升1.3%;金沙(01928)亦漲0.6%,不過阿Man講過,要揀濠賭股只揀銀娛、澳博(00880)等自己友,有外資股東嘅濠賭股避得就避。

自從侵侵上周話要制裁內地科企後,港股呢邊嘅科技股已率先下跌,華虹半導體(01347)及閱文集團(00772)兩份中期成績表都多好睇,兩股均顯著下跌,前者半日急挫13.3%,後者則跌一成。恒生科技指數中,只有騰訊(00700) 逆市向上,半日升0.8%。其他新經濟股及科技網全線仆直,口痕友話呢堆股份之前熱炒,股價已升至相當離地嘅價,依家調整亦好合理。另有消息指,之前炒得相當起勁嘅移卡(09923),噚日高位回落多一成咁滯,噚日午後此股玩熄燈,高位80元水平回落至50元水位,拖埋其他當炒半新股落水。估計係炒鬼呢期見科技股有得玩,但喺選擇太多,子彈太少嘅情況下借孖展,遇到某股急跌又未能補倉,打靶了事但卻令其他當炒股火燒連環船。騰訊將於今日收市後派成績表,求神拜佛保祐份成績表好好睇睇,明日可以帶領科技股走出今日急挫嘅黑暗時份。

麥狄文
(徐狄怡‧證監會持牌人)

 

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。