登入 直接訂購 如何使用?

【盤房來料】大市或向下尋找支持 暫未宜輕舉妄動

港股半日走勢反覆,市場擔心中美關係惡化,恒指高開低走,半日跌逾200點,創半個月低位。恒指高開28點報24483,升幅一度擴大至87點,見24542點半日高位。但市場擔心中美關係惡化,大市掉頭向下,一度跌286點,見半日低位24169點,臨近午市跌幅收窄。恒指半日收報24223,跌232點;國指午造9740,跌62點;科指半日收造7281,跌90點。

中美科技戰仍然打緊大風,今次風眼落左喺騰訊(00700)身上,美國除咗禁止國民下載WeChat;另外,華府亦針對騰訊旗下遊戲商展開國家安全審查。騰訊半日跌1.2%,報收518.5元,講真咁嘅跌幅都算好溫和。侵侵批准TikTok交易,不過大型科網股今日普遍都係腳軟,阿里巴巴(09988)半日跌0.7%;小米(01810)被主要股東減持後,股價持續偏軟,今日半日跌3.6%;京東集團(09618)跌0.4%;而受中美摩擦影響有限的美團點評(03690),半日逆市升1.6%。二線科技股中,以軟件股表現較差,微盟(02013)更跌7%,阿Man心水股之一嘅金蝶(00268)跌1.9%,已經算跌得少。

重磅科技股暫時無法支撐大市走高,傳統股則繼續死死吓,中國商務部日前公布《不可靠實體清單規定》,規定共有14條。中國官方媒體《環球時報》首席記者Qingqing Chen於Twitter引述消息人士稱,大笨象(00005)與聯邦快遞(FedEx)極可能被列入不可靠實體清單。大笨象本來已經弱過藥煲,大笨象半日一度失守30元,盤中低見29.6元,創25年低位跌4.4%。不過大笨象暫仍守2009年供股價28元,半日跌幅收窄至2.9%,報收30.05元。所謂久守必失,阿Man已經N咁多次呼籲要狠心跟大笨象分手,可惜唔少老派股民,好似中左降頭一樣,死坐唔肯走,總以為有一日可以見家鄉。大笨象嘅弱勢,拖累同系恒生(00011)半日跌1.7%;中銀香港(02388)亦跌1.2%。其他重磅股普遍表現疲弱,只有吉利(00175)半日升3%,跑贏大市。

濠賭股今日腳軟,有大行下調澳門賭收預測,亦削多隻賭業股目標價,整個板塊今日都無厘神氣,唔少股價跌幅超過3%,阿Man睇好嘅澳博(00880)跌1.2%算硬淨,暫時險守10元。

台海局勢再度緊張,軍工股有資金追捧,中船防務(00317)彈升12.4%;中航科工(02357)揚2.5%。不過阿Man唔建議買入呢類軍工股,台海局勢再緊張,中方亦未必會輕易喺台海開火。

留意港股或有機會下試23800至24000尋找支持,暫時咪手多輕舉妄動,就算有意趁低吸納都好,都係再觀察多兩日穩陣。

麥狄文
(徐狄怡‧證監會持牌人)

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。