登入 直接訂購 如何使用?

【盤房來料】愈逼近總統大選愈須審慎

隔晚美股先低後高,雖然新一輪刺激經濟方案看似要泡湯,但忽然眾議院大家姐表示,唔使等到明年1月就可以達成紓困方案協議,指如果無法與白宮迅速達成協議,眾議院民主黨人將解決相關問題。受呢個消息帶動,美股跌幅大大收窄,港股亦受帶動高開反彈。只可惜A股高開低走,上證中午更倒跌收市,港股曾升277點,受A股拖累,港股半日升幅收窄。

恒指高開35點報24194點,已經係半日低位,其後升幅擴大至277點,見半日高位24436點,可惜A股倒跌,港股亦高位回落。恒指中午報收24347點,升189點;國指中午報收9887點,升189點;恒科指半日升0.3%,中午報收7565點。

阿Man一直唔睇好嘅中資金融股今日帶動大市上升,建行(00939)跟工行(01398)分別升4%及3.3%,其他內銀股閒閒地升3%或以上,一對內險股平保(02318)升1%,國壽(02628)升2.6%,不過今日星期五,再加中資金融股今年都唔會有運行,升就由得佢,食花生算數。

科技股今早反彈,話咗ATMX呢啲唔需要太擔心,只要大市反彈,佢哋一定係先頭部隊,而市場擔心阿里(09988)旗下螞蟻上市計劃或有延誤,不過阿Man講咗冇有怕,而阿里獲大行提升目標價,半日反彈2.3%。不過呢幾大巨頭除咗小米(01810)之外,其餘三股半日升幅都縮咗水,始終周末前夕,缸邊友保守都好正常。

之前阿Man推介嘅安踏體育(02020)受惠內循環概念做好,而第三季品牌零售額低單位數增長,股價曾飆6.6%創新高,90元目標已達,相信喺85元樓下買咗嘅,都可以滿意哋食糊,過一個愉快周末。集團第三季,安踏品牌產品零售額按年錄得低單位數的增長。期內FILA品牌產品零售額按年錄得20%至25%的增長。至於其他品牌產品零售額亦錄得50%至55%的增長。

其他股份個別發展,而阿Man都係嗰句,只要港股守得住24200點,就算24000假穿,亦唔需要太擔心,不過愈逼近美國總統大選,要愈加小心,大市將持續波動,控制注碼係致勝之道,市況唔明朗就要更審慎,行騎樓底戴埋頭盔。

麥狄文

(徐狄怡‧證監會持牌人)

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。