登入 直接訂購 如何使用?

【盤房來料】阿里屋漏兼逢連夜雨

即使疫苗距離量產仲要時間,而且亦有副作用,但市場對疫苗仍有憧憬,美股上周全面估做好,三大指數升1%,標指更創收市新高。至於港股呢邊算係咁,不過高開低走唔多爽,人哋日股今早創咗29年高位,依家都仲係挨住高位行。

恒指今早高開205點,早段曾升237點,見26394點半日高,其後回順升幅收窄至只剩34點,低見26191。其後內地今早公布上月工業增加值及固定資產投好過預期,A股帶動下港股再度回升。恒指半日升106點,報26263點;國指半日微跌8點,報收10537點;恒科指半日升94點,報收8034點。

重磅藍籌股個別發展,友邦(01299)跟大笨象(00005)半日上升2.8%及3.2%,銀娛(00027)升3.7%,藍籌之中冧巴溫。侵侵向31家有軍方背景嘅中資企業開槍,中移動(00941)榜上有名,延續上周五跌勢,半日再跌近5%。阿里(09988)屋漏兼逢連夜雨,螞蟻被剎停原因馬雲衰多口,得罪阿爺已經濕滯,家下因為螞蟻撻Q,可能要面對美國股民集體訴訟,雖然上周急挫後有反彈,但明顯乏力,睇嚟有一段時間跑輸其他重磅科技股。至於騰訊(00700)派完成績表暫時冇乜嘢可以沖喜,股價喺600樓上有阻力,尤其上周急跌,夠膽撈貨嘅缸邊友閒閒地贏5-10%,咁短時間有錢落袋梗要沽貨套現。

中日等15國簽RCEP建超級經濟圈,意圖減少西方國家圍堵,而呢份協議有大行指紡織業係最受惠行業之一,相關股份半日有資金追捧,不過咁多紡織股之一,阿Man睇得上眼只有申洲(02313),半日升3.7%。其他紡織股好似互太(01382);天虹(02678)炒高及德永佳(00321)等等,平時成交拍烏蠅,市場深度不足,買咗好易走唔甩。
紡織股算冷門都炒上,今日仲炒高埋資源股,呢樣先令到阿Man心寒,由於市場憧憬疫苗面世後,明年經濟大復甦,帶動通脹回升,資源價格自然水漲船高,有資金追捧資源股,整個板塊嘅股份閒閒地升至少6%或以上。講真資源股一向唔係阿Man杯茶,至少資源價格能否隨經濟復甦亦係未知數,應該話經濟能否迅速復甦仲係疑問,要高追資源股就自己執生,阿Man完全無興趣。

恒指服務公司上周五完成季檢,國指九出九入,恒指剔出太古A(00019)一如阿Man預期,本來上次8月份季檢都預佢出局,點知捱多三個月,公司呢段時間仲出售重資產,一副走佬咁款嘅姿態,唔踢佢出局仲跌邊個。至於大熱嘅美團(03690) 唔使再倒灶,今次如市場期染藍;落選N次嘅安踏(02020)亦利獲納入;再加埋上市時已經話遲早染藍嘅百威(01876)亦獲欽點為成份股,美團半日升3.9%,但安踏跟百威則齊齊升6.5%。上周阿Man喺其他平台直播曾推介安踏今次染藍機會大增,之前一直失落藍籌寶座嘅安踏,今日終吐氣湯眉。反而係無估中百威會入選,不過阿Man想當年,百威重磅上市集資額破紀錄,當時亦係睇中佢遲早染藍而推介過,講真內需股作就係有內循環概念支撐股價,但講到增長速度,幾時都係處於成長期嘅新經濟股厲害。

麥狄文
(徐狄怡‧證監會持牌人)

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。