登入 直接訂購 如何使用?

【盤房來料】微信女股急跌早有先兆

美股就創完新高回落,可惜肺炎疫情未見高位回落,反而愈嚟愈嚴重,確診數字日日創新高,持續惡化未見頂,拖累美股隔晚再跌。加上侵侵未認輸,新一輪紓因計劃呈膠著狀態,兩黨未肯就有關刺激經濟措施重返談判桌,道指跟標指先升後回,更跌至全日低位收市。至於港股尋日創八個月高位後回吐,但回落幅度尚算溫和。

恒指低開83點,報26460,一開高位瞬間即逝,之後跌幅曾擴大至232點,見26311點半日低位,但10線上(26231點)見支持,大市跌幅收窄。恒指半日跌150點,收26394;國企指數收報10566,跌73點;恒生科指收報7892,跌80點。

藍籌股普遍下跌,舜宇(02382)噚日係威係勢,但今日有啲失色,半日跌2.5%,藍籌股包尾。ATMX目前美團(03690)未正式入成份股,半日跌2.6%,對指數冇影響,反而重騰訊(00700)跟阿里(09988)齊跌1.1%,阿里呢期都係弱咗。友邦(01299)半日跌1.3%,上到90呢啲位要回吐整固一下都正常。平保(02318)阻力咁啱又係90元,小心二度唔破變雙頂。

總理話要部署提振大宗消費、重點消費和促進釋放農村消費潛力,內需股有追捧。落選N次後終被納入成份股嘅安踏(02020)再創新高,半日升4.8%,博染藍上星期買咗,周一見裂口上升當然食糊先,原來今日再創高峰,阿Man心急早走咗。不過炒股嘅嘢,邊有神人可以永遠沽高位,同樣道理亦無可能摸到底買最低位,總之有糊要食係積極,買貨唔急實等得,沽唔到高位無蝕底,點計條數都係贏,買唔到貨最多錯失機會,好過高追亂買要輸錢。

除咗安踏之外,另一體品龍頭股李寧(02331)半日亦升3.5%,不過以估值計,安踏創完新高估值都平過李寧,二選一阿Man都係安踏優先。餐飲股亦有資金追捧,阿Man推介過嘅華潤啤酒(00291)亦創新高,半日升5.4%,當然係穿頂唔估頂,有貨可以set個止賺喺55繼續持有。其他今日做好嘅餐飲股仲有頤海(01579)漲2.2%;海底撈(06862)升3.2%;九毛九(09922)飆6%;而百勝中國(09987)則創本港上市後新高,半日升4.1%。

總理話要提振大宗消費,講到明擴大汽車消費,但汽車股個別發展,東風(00489)跟廣汽(02238)半日分別升7.1%及4.7%,其他汽車股普遍走低,阿Man愛股比亞迪(01211)早段曾逼近20日線,要撈貨喺170附近咁上下。

尋日阿Man喺社交平台預告羅馬集團(08072)今日會大跌,皆因有粉絲報料,再睇埋幅圖燶味十足,果然今日羅馬集團急跌超過七成。其實此股早前喺微信女群組之間瘋傳,由兩毫子起急升至0.8水平橫行,咁嘅格局急跌係遲早問題。話咗免費貼士永遠係最貴,今年社交媒體大量免費炒股群組湧現,就係以免費炒股貼士群組作招徠,之前叫咗大家咪上當,依家反而有口痕友話應該入去呢啲群組收料,目的係要避過好似羅馬呢類股份,講真妖股唔難分辨,手法都係炒高,橫行急跌派發,炒上難搵人跟,急跌大把人手多博反彈,呢吓最易派貨,唔貪心唔會死得人,又何需深入虎穴收集情報。

麥狄文
(徐狄怡‧證監會持牌人)

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。