登入 直接訂購 如何使用?

【盤房來料】光伏與物管股仍是首季核心投資板塊

美股上周五腳軟,三大指數向下,主要係市場喺拜登今個星期就職前,抱觀望態度,未敢輕舉妄動。港股今早跟美股上周五走勢低開,恒指低開119點報28454,曾跌183點報28390見半日低位。內地公布去年第四季GDP增6.5%,較市場預期為好。大市由跌轉升,恒指最多升199點報28773,再創去年1月20日以來高位。恒指中午報28712,升138點;國企指數升75點報11396;恒科指大幅跑贏,首次突破九千關,高見9094,半日升286點,報9061。

藍籌股個別發展,金融股表現遜色,大笨象(00005)跌逾2%,藍籌之中包尾,話咗唔好對大笨象有乜嘢期望,45元影都冇見過。內險跟內銀股表現亦失色,普遍跌1%以上,提一提大家,每到春節前,內地例牌水緊,呢個板塊通常無運行。中資電訊股續反彈,中移動(00941)跟聯通(00762)升逾4%,不過呢個板塊一向唔係阿Man杯茶。港交所(00388)不愧為阿Man愛股之一,今日又創新高見476.6元,半日升3.4%,今年港交所鐵定變身大牛股,啡底五舊無走雞。

科技股表現出色,騰訊(00700)再創667.5元新高,半日升勢回順升1.9%,似乎未受內地擴大整頓網路金融平台存款服務所影響。美團(03690)亦逼近前高位338.2元,半日最高見327元,半日升5.4%。小米(01810)上周五因為制裁消息跌一成,阿Man已表示係建倉好機會,50日線穩守,半日反彈近3%,能夠企穩30元,好快可以收復10及20日線失地,即係短線可重上32元。上周阿Man曾經喺其他平台推介過丘鈦(01478),指公司有機會發盈喜,加上公司考慮分拆全資附屬昆山丘鈦微電子,消息成股價催化劑。話口未完,就喺周末出咗個盈喜,半日股價急升近15%,帶動行業龍頭舜宇(02382)半日升8.5%,成為半日升幅最大藍籌股。

物管股繼續做好,恒大物業(06666)半日升25.2%,阿Man一向唔多like恒大一系,講到尾恒大呢一系唔係一普炒家應付得到。阿Man都係睇啲大隻啲嘅,呢期心儀對象都係融創服務(01516),股價今日重返前高位,要創新高無難道,繼續向住首個目標27元進發。上星期跌到死死吓嘅光伏股,今日有返啲起色,話咗新能源股仍然係今年上半年嘅焦點板塊,跟物管股一樣,呢一兩個板塊至少會係第一季投資組合內,不可或缺嘅核心投資。

麥狄文

(徐狄怡‧證監會持牌人)

 

股票及指數資料由天滙財經有限公司,泓滙財經資訊有限公司及財經智珠網有限公司提供。外滙及黃金報價由路透社提供。