【盤房來料】靜觀其變 結算後再定策略

有關債務上限談判，睇嚟唔到最後死線都唔會搞掂，美股隔晚個別發展，港股繼續日升日跌，噚日反彈逾二百點後，今早被A股拖後腿，半日跌逾百點收市，成交進一步縮水至僅僅過400億元。

恒指高開35點，早段曾升90點，見19769半日高位後無以為繼。大市掉頭向下，最多跌124點，見19553半日低位，再度失守250天線(19691點)，當然10天線亦得而復失。恒指半日收報19563，跌114點；國指跌27點，報6666；恒科指跌9點，收3893。半日成交額僅得409.64億元，買賣兩閒，靜到拍烏蠅。

藍籌股普遍受壓，友邦(01299)半日跌0.2%，大笨象(00005)持平，但港交所(00388)由350元下跌咗咁多日，呢兩日喺300元關口前喘定，半日逆市彈0.2%。重磅科網股，只有未公布業績嘅美團(03690)仲頂得住，半日逆市升1.6%，但ATJB全線下跌，業績後股價全部走軟，博炒業績走遲半部又被割韭菜。

內地專家指，2023年新冠第二波疫情高峰將於6月底出現，疫情相關股份今日落鑊，開拓藥業(09939)炒高一成，康希諾(06185)升逾半成，其他藥股亦有炒作，升幅由超過1%至7%不等。

噚日係威係勢嘅電力股，今日全線回吐，華潤電力(00836)跌2.4%；華能(00902)跟華電(01071)半日齊跌逾4%，其他電力股普遍跌2%或以上。相反光伏股今日無啦啦炒上，有內地傳媒指中國首季光伏新裝機組，等於2022年上半年總和，反映光伏市場回暖復甦，光伏股乘機落鑊，當中以福萊特玻璃(06865)表現最突出，半日升近一成。不過光伏股都係出咗名難炒，今日強勢明日可以無咗影，追貨跟炒自己執生，有唔對路要識跳車。

本地公用股今日明顯較弱，電能(00006)半日跌近4%，有議員指上月港島發生大停電，但電力公司竟然唔需要受罰，表示有需要為電力公司引入賞罰機制，未來電力公司就要承受返服務質素未能達標受罰嘅風險。其他公用股今日亦見腳軟，跌幅由0.8%至近3%不等。

半日市成交額只有400億多少少，全日成交額肯定又縮水少過噚日，今個禮拜長周末假期，緊接下周二期指結算，呢段時間大家入市意欲極低，都係靜觀其變，等期結後大市會否有較明確方向再作定奪。

麥狄文
(徐狄怡‧證監會持牌人)