【盤房來料】周大福創建及信置同為收息股之選

美國關稅政策憂慮揮之不去，加上大型銀行股捱沽，美股隔晚反覆偏軟，拖累今早港股亦走低。恒指低開86點後持續向下，一度跌近300點，至23849半日低位，半日報收23970，跌幅收窄至177點或0.73%。國指跌66點或0.76%，報8642；科指又復弱勢，半日跌60點或1.14%，報收5265。半日成交額1223億元，沽壓唔算嚴重。

不過，美國總統特朗普已確認8月1日為新對等關稅最後期限。同時表示美國將對進口銅實施50%新關稅，而半導體及製藥業亦為未來徵收關稅嘅目標。喺關稅前景唔明朗下，環球股市難免受影響，基金追貨意欲唔大，市場傾向炒股唔炒市，或選收息股以逸待勞。

科技股繼續拖低大市，重磅科技股只有攜程(09961)逆市升1%；騰訊(00700)跌1.7%；阿里巴巴(09988)跌1.5%；美團(03690)跌0.65%；京東(09618)跌0.54%；小米集團(01810)跌1.6%；快手(01024)跌1.7%；百度(09888)跌0.5%；網易(09999)更跌2.8%。

金融股偏軟，內銀股個別發展，建行(00939)及中行(03988)靠穩，但工行(01398)跟招行(03968)隨大市回落。內險股亦隨大市下跌，平保(02318)跌1.6%；國壽(02628)跌0.87%。大笨象(00005)跌0.1%；友邦保險(01299)跌0.4%；港交所(00388)跌1.3%，又跌穿20日線之下。

恒地(00012)發行80億元有擔保可換股債，股價急跌8.2%，為表現最差藍籌股。其他地產股亦偏軟，新地(00016)跌2.7%；恒隆地產(00101)跌3.9%；長實集團(01113)跌0.7%；新世界發展(00017)跌3.2%。其實多隻地產股中，以信置(00083)財務壓力較低，甚至坐擁巨額現金，料無集資壓力，半日僅跌0.9%，係不俗收息股之選。講開地產股，財務壓力最大嘅新世界發展，亦已於上周成功達成882億元再融資，避免陷入違約。其實喺新世界與多間銀行達成再融資協議前，坊間唔少揣測，同屬鄭氏家族嘅周大福珠寶(01929)及周大福創建(00659)會否出手襄助，更誇張嘅猜測係，呢兩間同屬鄭氏家族嘅公司會否被鄭氏家族以一啲手段，暗渡陳倉將周大福及周大福創建嘅錢抬去拯救新世界。有咁嘅揣測，似乎係「靠估人士」對本港上市條例並不熟悉。

新世界同周大福呢一系股份，早於2023年重組後，前身為新創建嘅周大福創建，已完全剝離新世界，並由周大福企業直接持有，並易名為周大福創建以正視聽，希望市場能清楚了解，周大福創建已跟新世界再無關係。而作為本港上市公司，周大福創建進行任何企業動作，須嚴格遵守上市規則，適時披露，唔係話同一家族，可以隨隨便便咁左袋右袋，將幾間公司嘅錢搬嚟搬去。目前亦好清楚睇到，新世界已自己同銀行搞掂再融資，根本唔應該胡亂揣測。市場有咁嘅揣測，可能同周大福創建於今年1月曾發行7月到期嘅7.8億元CB有關，市場以為公司為新世界籌旗。其實呢批CB只得1億美元，好細規模，公司都講明，發CB主要為恢復25%公眾持股量。

按聯交所資料，截至今年6月底，周大福創建的公眾持股量為24.07%。換句話講，喺下半年周大福創建仍有機會再發行CB去恢復25%公眾持股量。其實周大福創建都算係為股東着想，透過發行CB代替配股去提高公眾持股量，唔會大幅攤薄現有股東股益。睇返周大福創建嘅業務，全部為公司提供穩定現金流，令公司一直保持穩健財政狀況。截至 2024年12月底，公司可動用流動資金總額約299億元，其中包括現金及銀行結存約186億元，淨負債比率在39%健康水平，資金充裕，無融資需要，公司已經連續22年派息，現價股息率高達雙位數，亦為收息股之選。

麥狄文

(徐狄怡‧證監會持牌人)