盤房來料丨市場觀望美國法院關稅裁決結果

港股昨日回吐持續，恒生指數低開156後跌勢持續，盤中最多跌498點至25960低位，收市跌309點，報26149，成交額為2682億元。港股經過急升逾千點後出現回吐，短短兩個交易日由高位回吐升幅達三分二，回吐幅度似乎過多，幸而昨日仍守於26000關之上，此關為5周、10周及20周線滙聚區，亦為50日線及100日線附近，極為重要，暫時叫守住並剛好重返10日線約26100之上收市，總算未有破壞整體升勢。至夜期時段，反彈持續，更重返26300水平，今早黑期亦處於26300水平之上。今日恒生指數高開報26272，可惜高開後略見26299半日高位後，即掉頭回落，並未有跟隨A股再升，半日最低見26114，剛好喺條10日線附近守住，半日報收26158，成交額只有1352億元。

恒指半日波幅較細，只有185點，除咗因為周末效應，缸邊友唔會太進取之外，今晚仲係美國最高法院將就總統特朗普使用緊急關稅權力作出裁決，料對環球金融市場帶來震盪，缸邊友觀望下都正常。雖然關稅一旦被取消，即時反應係刺激股市上升，但若最高法院推翻關稅措施同時要求退還所有關稅，將對市場構成重大衝擊，因為等同短期內從金融系統中抽走流動性。要求退款嘅裁決可能促使財政部增加發債。之後美國政府或轉向其他法律途徑徵收較低稅率，年化關稅收入可能大幅減少，從而再引發市場對美國財政前景擔憂。而即使股市第一反應喺撤銷關稅後興奮，出現急升都可能只係曇花一現，因為以特朗普及其政府風格，或者會迅速利用其他條款重新徵收關稅，特朗普可以轉向其他法律途徑來徵收關稅，個別稅率可以高達15%，幾乎跟目前關稅率無分別。

下半場暫時唔會有太大方向，升跌比例方面亦唔大啟示，只係個市上唔返26300，又喺開市價下面，走勢偏淡少少，要結束調整回復升勢，就要企返穩26500。噚日個市落到26000邊，喺幾條周線滙聚區同50日線附近反彈，留意今日下半場26100呢個位不容再失，失守再次考驗25950-26000，穿噚日低位嘅話，再下一個支持就係20日線大約係25862，剛好25850-25900有一個重牛區，一如噚日所講，順手去KO埋啲重牛亦唔出奇。不過25800-25850應該有頗大支持，因為嚟度呢個位，周波幅都已足1000點，滿足波幅需求，下周個市點發展，已經係下星期嘅事。

美股方面，噚晚三個指數個別發展，個NQ阻力仍然係25950，噚日個25700分水嶺盤中一直企唔穩，咁就喺幾條平均線之間上落，分別係5日線25726，10日線25673同埋20日線嘅25580。估計今晚喺關稅裁決有結果前，美股股指期貨變化唔大，NQ啲位無乜變，今日可以用個25650做個好淡分界線，上方首個阻力就係25750；下方首個支持25550，有機會早段行住窄幅先。阿Man認為今日都係保守少少好，唔做唔錯，寧願等關稅裁決結果出咗嚟再作部署，所以無論港股跟美股，今日都無乜心水。

不過呢幾日提住嘅太空板塊，果然係大上大落，除咗呢個板塊短炒充滿機會，今年有關自動駕駛嘅股份亦值得留意，市場對自動駕駛呢個板塊相當樂觀，預計到2030年，全球將有220萬輛Robotaxi投入使用，而呢個數字將會喺2040年激增至2.45億輛，並最終在2050年達到7.22億輛，預計未來5至15年，呢個行業規模將會以幾何級數增長，可以留意嘅股份有PONY同埋AUR，若然兩股見回調，前者喺15-16美元搵位上車，後者就大約4.5至4.6美元。

麥狄文

(徐狄怡‧證監會持牌人)