盤房來料丨阿里傳分拆暫未能帶動大市重返二萬七

歐美針對格陵蘭嘅緊張關係降溫，加上美國最新經濟數據穩健，美股周四續反彈，道指高開124點後，升幅擴大至最多530點，收市道指升306點或0.63%，報49384；標指升37點或0.55%，報6913；納指升211點或0.91%，報23436。至於港股噚晚ADR同夜期都造好，除咗係跟美股走強之外，路透有消息指阿里巴巴(09988)計劃分拆半導體業務平頭哥上市，刺激阿里ADS股價急升逾5%，夜期及ADR升至26800-26900水平。

講返美股都算係強勢，之前阿Man提過嘅股份，大部份都有唔錯反彈，如果有貼近支持位附近上車，留意返阻力位可以減下磅。今日就想同大家討論下Netflix，NFLX近呢半年股價表現係唔多掂，累計半年已跌近三成。啱啱公布業績個指引仲要遜預期，結果畀人踩多腳，噚晚落到83美元邊。不過80至85美元嘅NFLX應該已反映晒佢啲負面因素，包括收購華納兄弟為公司帶來財務壓力，以及公司喺製作費方面要加大投資，令成本上漲。以中長線角度睇，現價去買NFLX再大跌風險應有限，用返個78至80美元做防守，不過NFLX買咗唔好預佢短期會有大升幅，或者要經一輪收集，但完成收購華納兄弟後，又體現到協同效益，中長線嚟講，上返100美元應該無乜問題。

至於NQ方面，25700為今晚個好淡分水嶺，企得到25700就守返10日線同20日線，有條件再行反上去25800-25900，但呢兩個位會有啲阻力25850/25950係今晩嘅阻力，至於初步支為25650/25550，盤中最大支持係25450-25400不容有失。

至於港股呢兩日表現反覆，今早恒生指數高開，重返26800水平之上，恒生指數最多升265點，高見26895，無奈未能繼續高走，半日升幅收窄至只有88點，報收26718，成交額只有1279億元。近日成交額都係偏少，反映投資者取態仍審慎。雖然美國總統特朗普，就有關謀取格陵蘭表示唔會動武，並與北約進行談判，並唔會對歐洲8國加徵額外關稅，令地緣政治緊張局勢有所降溫，但美債息僅從高位稍為回落，金價亦高企，反映市場避險情緒未完全下降，資金傾向分散投資。

近期各地股市波動，不過中港股抗跌力不俗，資金於個別板塊仍有炒作，表示仍有資金積極於港股尋找機會，尤其中港股市受近日地緣政治事件影響較低，加上人民幣走強，都對中港股市有利。港股暫時仍於高位反覆，只要恒指守到喺26600水平之上，並企穩26750，本月仍有機會向上挑戰二萬七。不過暫時27000仍有一定阻力，周線及日線保歷加頂部約27100-27200阻力更大，加上近日成交縮減，以目前月波幅1576點計算，未必一定要再擴大波幅。

下周四期指結算，下周開始踏入期指轉高峰期，料大市將進行整固，或待期指結算後，再配合利好消息，方能向上突破，如期間外圍再有利淡消息對股市帶來震盪，下方則以26000-26300為較大支持位。留意26600-26700為重要支持，再失26600，有機會下試20日線。睇住港交所(00388)呢隻大市前指標，下半場一下急落，執筆時剛好失咗20日線，原因係外電引述知情人士透露，由於境外融資熱潮引發對交易質量擔憂，中國證券監管機構正考慮收緊內地企業赴港上市(售股)門檻。如果港交所上唔返條20日線大約係424.5，咁大市下周就有機會都要回試26400條20日線。

麥狄文

(徐狄怡‧證監會持牌人)