盤房來料丨港股短線超賣回調二萬七料有大支持

美股噚晚大玩過山車，雖然Meta業績理想並唱好前景，抵消AI相關開支增加憂慮，股價急升一成；微軟雲端業務增長前景掀憂慮，加上開支多過預期，股價急瀉10%，為跌幅最大道指成份股， 一度拖累納指跌逾2%。NQ噚日唔記得畀啲支持同阻力位大家，結果NQ開市企唔穩26250之後就回調，穿埋26000同25900支持位後，更急瀉至50日線，喺25500-25550水平先識得刹車，結果即晚反彈一度重見26000水平，可惜都係企唔穩，今早喺亞洲時段，NQ又落返25900樓下。今晚NQ個分水嶺係25900，下面支持25800/25700/25600/25500，上方阻力26100/26200/26300/26400，26399為前頂，上破即突破，但暫時睇唔到有乜嘢條件向上突破，有機繼續區間上落，只不過個移動間因為波幅擴大而闊咗，由25500去到26300咁上下。

至於個股方面，Meta急升，短炒識食下糊，想坐長啲就用個700美元做防守。微軟MSFT比預期回得多咗，穿埋440美元，一度跌穿428防守位，收市彈返去433.5，呢兩日要盡彈返上440美元樓上，現價加注噚晚低位唔可以再穿421.2元。至於RDW初步阻力13.6美元，短炒呢啲價可以減一減，游下水先。

噚晚除咗納指坐過山車，金價同銀價一樣相當刺激，現貨金價跌穿5500美元水平後，一度急跌至5100水平，穿5500短炒先止賺，暫時5000-5150有支持，短期個位或者係5000-5500之間上落住先，可以睇住呢10%炒下上落。現貨銀價一度揚升4.3%至121.654美元，齊刷新紀錄，其後一度倒跌8.6%至106.811美元，尾段輕微轉升。

貴金屬價急回，主要原因係特朗普將公布下任聯儲局主席人選為沃什Kevin Warsh，佢一向初視為鷹派代表，市場擔心佢上任後，減息速度同幅度都可能比預期少咗。其實阿Man又有少少唔明，侵侵點解會揀個鷹派代表做主席，口痕友陰謀論，話侵侵專登咁做，先可以不時有藉口將個股市舞高弄低，雖然好難搵到乜嘢證據侵侵家族自佢上任以嚟，喺資本市場偷步操作賺咗幾多錢，但華爾街有傳聞侵侵家族自佢上任以嚟，透過資本市場包括加密貨幣同股票或股指期貨炒作，已賺取數以十億美元利潤。當然呢啲都係市場傳聞，但噚晚美國市場嘅反應，就係話畀大家知，市場對於候任主席人選同息口路嘅睇法。

至於港股昨日二萬八關得而復失，恒生指數早段低開199點後，一度跌215點見27611低位，其後倒升，曾高見28056超過四年半高位。不過二萬八關未能企穩，收市報27968，升141點或0.42%，成交額3319億元。不過至夜期時段，一度受納指急挫拖累，夜期一度急回，甚至跌穿27600水平，打回原形。其後反彈重返27800水平，ADR及今早黑期於27800水平徘徊，恒生指數今早低開182點，其後喺A股急瀉下，跌幅持續擴大，基本上係單邊插水，即使內地股市跌幅收窄，港股仍然喺低位徘徊。盤中一度跌536點至27431低位，半日跌498點或1.78%，報27469；主板成交1653億元。

不過近日港股持續走強，主要受惠環球投資者加強美股以外市場配置；加上因美元貶值，港元跟美元掛鈎情況下，變相拉低港股估值，而港股大部份上市企業為內地企業，收入以人民幣為主，人民幣強勢下，變相收入被拉高，呢兩個因素同時吸引更多海外資金投放於港股市場。只係二萬八心理關口，未能一時三刻就企穩，加上連升七個交易日後，港股短線呈超買，料短線或先行於二萬八關之下作整固，但調整幅度未必太大，或者可以高位橫行修正超買指標代替調整。

踏入業績期後，如企業業績保持平穩，以及展望前景理想，或吸引更多資金入市，其後有望再向上突破。大市如午後持續於27600水平之下徘徊，下周有機會進一步調整，下方支持為27400/27200/27000，至於反彈企唔返27800，調整持續，如企穩27800，後市則有望再向上挑戰28000/28200/28400。不過港股短線超買，技術指標爆晒標，就算唔回調至27000呢個大支持位，喺27400/27200已有支持嘅話，大市或先於27200-27800，要企得穩27800似乎都需要啲時間整固一下。

麥狄文

(徐狄怡‧證監會持牌人)