盤房來料丨港股廿日線附近上落 暫受制二萬七

美伊局勢又再轉趨緊張，貴金屬市場再度回勇，反映資金避險情緒仍然高漲，噚晚美股受壓，雖然早段道指曾反彈200點，更再創49653即市新高，但其後急轉直下，主要係重磅科技股回軟，當中Nvidia一度跌逾5%，雖然收市跌幅收窄至2.8%，但加埋微軟都跌近3%，足以令道指由升轉跌。收市道指反覆回吐166點或0.34%，報49240；標指跌58點或0.84%，報6917；納指跌336點或1.43%，報23255。

Anthropic公司發布的嘅AI新工具，引發市場對現有商業模式將被顛覆嘅擔憂，尤其係軟件股自去年4月以嚟，被洗倉最嚴重一日，法律軟件股及數據服務公司首當其衝，加拿大資訊商湯森路透(Thomson Reuters)股價跌15.8%，Legalzoom.com暴跌逾20%。摩根士丹利分析員認為，Anthropic為法律領域推出嘅新功能加劇產業競爭，其實有咗AI，變相唔需要SAAS，軟件股畀啲券商不斷de-rate正常。資金轉去追捧消費股，沃爾瑪升2.9%，市值首次突破一萬億美元；百事公司(Pepsi)計劃將主要品牌產品減價最多15%，以提振銷量，股價逆市升近5%。

重磅科技股唔精神，個NQ自然軟弱無力，雖然早段雖然高企於26000水平，無奈26050呢個阻力都係打唔穿，結果噚日個分水嶺25950之後每況愈下，一口氣下試全部支持位兼失守，最終叫守返條100日線，上返25350收市，暫時亞洲時段喺25400水平徘徊，其實搞嚟搞去，個NQ都走唔出25000-26000呢個移動區間。今晚NQ個好淡分水嶺喺25400，下方首個支持為25300，重要支持為25200，上方反彈阻力25600，下一阻力25700，本日較大阻力為25800。PLTR提咗可以先食糊或以160美元止賺，暫時食咗糊就等等先。META上到740水平回吐，暫時返咗落嚟690，暫時可以睇住個區間，大約680至750之間炒住上落先。至於之前提到NFLX去到80美元左右可以開始收集，用返個75美元做防守，但無耐性嘅就咪搞，預咗係收集，短炒就唔係好啱。另外阿Man打算吼位睇下FLY有無喺22-23美元左右上車，之前喺接近高位集資，公司較少資金壓力，等22-23美元收集，用返個20美元做防守。

港股今早表現反覆偏軟，恒生指數反覆低開37點後，一度倒升64點見26899半日高位，可惜20日線約26850得而復失，其後再轉跌，最多倒跌241點，見26593低位。半日跌幅收窄至109點，報收26724。成交額1514億元，呢兩日個市都係喺條20日線上下拉鋸，可以話成也廿日線，敗也廿日線。值得留意恒指由12月16日低位25086延伸至今嘅上升軌，暫時已上升軌底部已上移至26800水平附近，即使過去兩個交易日下跌，收市都叫守得到條上升軌，假如今日係無法重返上升軌底部，加上受制孤島利淡形態，有機會扭轉之前升勢，展開跌浪。相反企返條上升軌26800，成功回補裂口，成功企穩27400，解除孤島威脅，咁後市先有條件再向上攻頂。

個股方面，留意返隻泡泡瑪特(09992)，公司上月共回購190萬股，而其中140萬份已經註銷，充分顯示管理層對股價及公司未來發展的信心。泡泡瑪特作為潮玩龍頭，公司的IP打造與運營能力得到持續驗證、海外渠道維持迅猛成長；同時IP樂園、聯名活動等有望提升IP運營深度，長線IP打造與運營、商業化變現能力有望持續增強；當前業績與估值低位，具備估值上修空間。技術走勢面，較早前公司於180元至220元之間成功築底，暫時上咗220樓上，即使呢幾日個市表現麻麻，泡泡瑪特都跑贏個市。210至230元收集，以200元作為防守，如股價能企穩240元，有望重返260-280元。恒指方面，留意個26850為好淡分界線，下方支持26750/26650，穿咗26650有機會試返噚日低位26450；上方阻力為26950/27050，企得檼27050先有機會上去修復個孤島。

麥狄文

(徐狄怡‧證監會持牌人)