盤房來料丨港股續調整或下試50及100日線

市場繼續擔心新嘅人工智能(AI)工具會取代軟件，對相關企業構成衝擊，即使Nvidia黃仁勳已就此駁斥，但市場未有理會，繼續沽售相關股份，資金流向科技以外股份，美股周三個別發展。道指高開82點後，升幅擴大至最多408點，高見49649，直逼盤中歷史高位49653，其後受美伊取消核談判計劃，美伊局勢再度緊張影響，道指一度輕微倒跌，不過收市仍回升260點或0.53%；但科技股弱勢下，標指跌35點或0.51%，報6882；納指跌350點或1.51%，報22904。

之前講咗要買就吼位買MAG 7，暫時呢啲股大部分仲守到個防守位，除咗MSFT同NVDA同TSLA，略穿咗個支持位，分別係428、176同埋406，今明兩晚要睇下守唔守得返，上唔返嘅話，或者要減一減磅，未買就睇多兩日先上車。

至於個NQ，噚日食咗瀉藥咁，一開市就穿咗個25400好淡分水嶺，落到25200稍作支持，穿咗個重要支持位，就一直落到24800附近先見支持反彈，但到亞洲時段都未上返25000水平，走勢比較弱。本以為納指仍然喺25000至26000呢個range，噚日跌穿咗25000，家下個移動區間要下移，有機會下移至24700至25700呢個range，下方24700大約係30周線附近，而上方25700正好係10、20日同30日線嘅滙聚區，呢三條平均線，暫時變成反彈阻力。至於今晚NQ好淡分水嶺25000，下方支持24900/24800/24700，反彈阻力25100/25200/25300，最大支持為24700即30周線，而最大阻力暫時係25300大約係20周線。個股方面，吼緊隻MU，雖然呢個板塊整體表現麻麻，但MU相對硬淨，暫時用個360做防守，吼下有冇365-368上車，上面反彈阻力380-400。

港股昨日繼續反覆，恒生指數低開37點後，一度跌241點見26593低位，隨住A股回升，盤中一度倒升169點見27004高位，收市升幅收窄至12點，報收26847，成交額2854億元。至夜期時段，受美股科技股拖累納指顯著下跌拖累，夜期及ADR跌逾1%，夜期一度跌穿26500水平，而ADR亦跌至26600水平，今早黑期於26600水平徘徊。

恒生指數低開219點，早段一度後436點至26410低位，半日跌幅收窄至340點或1.27%，報26506；國企指數跌87點或0.96%，報8960；科技指數跌62點或1.15%，報5304。成交1682億元。暫時個恒指失守咗條20日線同上升軌底部，明顯轉弱咗，技術指標方面，短線RSI 2跌穿咗10，通常短線RSI 2去到2-10左右會反彈，但暫時去到8，即係仲有機會落多少少，大約就係26250-26300左右，即係50及100日線，應該會反彈，剛好26200-26400又係重牛區，殺埋呢堆重牛，個市反彈亦合理。個股可以睇返港交所(00388)，390-400元有一定防守力，大市反彈嘅話，港交所以可以同步反彈，反彈首個目標為425-430，要企返穩430元先有機會扭轉弱勢。

由於科技股近日走弱，早前已表示，重磅科技走弱，加上恒指日線圖周一出現大裂口下跌，以回補上周上升裂口，形成島型頂利淡形態，將大大減弱大市反彈動力。事實上過去三個交易日，反彈高位確係一日低於一日，暫時27000由前支持變為阻力，如大市一直亦未能回補周一遺下嘅下跌裂口，即回升至27400水平之上，向下考驗50日及100日線機會大增。不過26400為再破52周高位前回調一個支持位，即使今日回試50及100日線即26300水平，仍有機會反彈重上26400關。留意如考驗26300水平後，反彈至26400關不能企穩，則有機會再向下往日線保歷加通道底部約26000尋找支持。暫時由12月16日底部延伸至今嘅上升通道底部，將由25800水平進一步上移至26900，明日將上移至27000，料跌穿上升通道後，此通道底部將變成短期反彈阻力。

麥狄文

(徐狄怡‧證監會持牌人)