盤房來料丨馬年紅盤低開低走暫守100日線

今日大年初四開市吉日，阿Man先同大家拜年，祝各位一馬當先，馬到功成，財運亨通。美伊緊張關係升溫，中東戰雲密布，市場資金避險，美股隔晚偏軟，道指低開86點後，一度跌465點，收市跌267點或0.54%，報收49395；標指跌19點或0.28%，報收6861；納指跌70點或0.31%，報收22682。

美國多項數據出爐，首次申領失業救濟人數創去年11月以來最大跌幅，少過預期；不過持續申領失業救濟人數增加1.7萬，略多過預期。值得留意係美國去年12月份貿易赤字由11月嘅530億美元，擴大至703億美元，遠多過預期555億美元。以2025年全年計，美國貿赤略為降至9015億美元，仍為1960年有統計以來最多年份之一，對中國台灣逆差擴大至1468億美元紀錄新高，對中國內地貿赤則從2024年2955億美元，縮減至2021億美元逾20年低位，反映對華進口徵收關稅影響浮現。而美國最高法院預計將於今日就針對總統特朗普關稅幾宗案件發表意見，投資者正關注最高法院會否就特朗普去年依據《國際緊急經濟權力法》實施嘅關稅合法性做出裁決。全球有數千家企業已提出訴訟，挑戰特朗普關稅政策，並要求退還已繳納嘅關稅。一旦裁決有結果，如果要退還關稅，定必令環球股市出現震盪。

今晚美國將公布聯儲局視為重要通脹指標嘅核心PCE數據，同埋第四季GDP，加上最高法院或就特朗普關稅政策作出裁決，今晚美股或較為波動。至於NQ喺過去三個交易日表現反覆，暫時仍未企穩25000水平，即10日線仍未企穩，至於20日線、50日線同埋100日線更加連影都冇，走勢上係較為利淡。今晚NQ嘅好淡分水嶺喺24850，大約5日線，上方首個阻力25000，下一阻力25200/25300；預料25400-25500阻力更大。至於下方首個支持為24700，下一支持24600/24500，預料24400/24300有不俗支持。

個股方面，都係想吼位買ONDS，初步支持喺9.8-10.8美元，較大支持喺9.3-9.5美元，吼位喺10-11元上車，上方首個阻力為11.8至12.8元，但中線有信心可以破前頂，暫時目標先睇14-16美元。至於短線軍工股仍會熱炒，LMT上咗52周高位，如見回調640元左右上車，短炒用630美元做防守，目標先睇680美元。

至於港股喺馬年第一個交易日，未能紅盤高開，恒生指數低開48點後，因中東地緣局勢緊張，美伊之間火藥味濃，外圍股市疲軟，港股低開低走，最多曾跌348點，見26356半日低位，一度失守50日線(26421)；幸而100日線(26313)見支持，半日跌幅收窄至161點，報收26544。國指則跌53點或0.59%，報收9016；恒科指跌122點或2.28%，報收5245。北水仍缺席下，半日成交額只有917億元。

恒科指跌逾2%，科技股走勢疲弱，騰訊(00700)跌1.9%；阿里巴巴(09988)跌3.7%；美團(03690)跌1.7%；小米集團(01810)跌2.2%；京東集團(09618)跌1.4%；快手(01024)跌2.4%。金融股靠穩，大笨象(00005)升0.1%；友邦保險(01299)升0.4%；中國平安(02318)升0.2%；港交所(00388)升0.1%。開年阿Man想吼位買返啲內險股，博下周A股紅盤高開高走，70-72買平保，用個69元做防守，博佢上返74元高位再睇有冇突破向上。

今日北水仍因內地春節假期而缺席，令大市成交減少，大市動力不足，缺乏北水下，大市表現料隨外圍股市波動。市場仍憧憬內地下月初人大會議舉行，或有政策對股市有利，加上北水流入港股趨勢並未有變，料馬年港股仍有機會連續第三年錄得上升。不過港股經過兩年升市後，目前估值其實已經唔算便宜，港股升勢料唔可以再靠估值修復推動，反而由資金推動大市繼續向上。

外圍利率環境下行、美元信心薄弱，中美息差具收窄空間，有望為港股於馬年吸引外資回流。另一方面，北水流入港股水平總體持續增加嘅趨料唔會改變。過去一年，北水累計持有額度一路創新高，預期馬年情況維持，對於港股日均成交有兩至三成為北水嘅市場來講，將形成長期利好支持。而內地利率環境偏低，人民幣資產進行全球配置長期戰略選擇下，北水持續流入為港股大幅增加流動性。板塊方面，科技板塊嘅AI及機械人相關股份仍值得關注，今日機械人已率先落鑊；資源板塊料繼續有資金追，而金融板塊就以國際銀行股同內險股較偏好。

麥狄文

(徐狄怡‧證監會持牌人)