盤房來料丨恒指反彈暫受制100日線 留意20日線能否企穩

國際油價從高位回落，加上幾間大行齊齊唱好後市，美股周一顯著反彈，道指高開148點後，升幅擴大至最多617點，高見47176，標指曾升1.47%，納指一度升1.88%。美市收市，道指升387點或0.83%，報46946；標指升67點或1.01%，報6699；納指升268點或1.22%，報22374。重磅股中，Nvidia年度人工智能(AI)會議周一起召開，收市股價升1.6%。Meta表示將計劃大規模裁員，影響兩成或更多員工，股價喺裁員能節省開支呢個邏輯下升2.3%。美光科技(Micron)本周稍後公布業績，股價偷步炒高3.7%。金融股止跌回穩，花旗及高盛股價均揚升1.6%，不過留意個人信貸問題有否惡化，將影響金融股後市表現。

雖然伊朗戰爭未結束，但高盛預期標指最終重展升勢，延續地緣政治事件後市場通常重新向上嘅歷史模式，該行表示，基本情景已反映宏觀經濟逆風，同時盈利繼續增長，估值即使相對歷史水平仍偏高，但較數月前合理。大摩亦唱好美股，若從未來6至12個月角度，依然睇好美股。他對標指今年底預測為7800，即較上周五收市有約18%上升空間，高盛嘅標指目標為7600。暫時市場仍樂觀地審慎，始終戰事未結束，油價仍高企。

油價噚日喺亞洲早市揚升逾3%後，紐約期油收市回落5.28%，每桶報93.5美元；但布蘭特期油漲2.84%，收報100.21美元，為連續3個交易日收於100美元整數心理關口上方。美國財長貝桑於CNBC訪問中否認華府曾干預能源衍生工具市場。聯儲局今晚起舉行一連兩日議息會議，油價回順有助紓緩通脹壓力，美國10年期債息最多回落7個基點至4.215厘。美滙指數一度回落0.7%至99.66，日圓升0.56%至158.85兌每美元。現貨金價曾升0.37%，暫企穩5000美元水平。加密貨幣「一哥」比特幣一度抽上3.86%，至74512美元，為6周以來高位。不過之前阿Man都講咗，BTC暫時都係炒上落，range大約係65000至75000美元之間上落，上下可以畀多2000美元buffer，短期難望重拾之前升勢。

暫時個股都係咁上下，仍然係區間上落，之前提過嘅CRWV繼續守喺支持位上方，但阿Man最近研究埋呢一隻同類AI股份NBIS，公司都係做AI基礎設施嘅公司，擁有歐洲最大嘅商用超級電腦數據中心。公司亦獲得NVIDIA戰略入股，係其官方雲端合作夥伴。公司同微軟及META都有簽訂AI基建合約，接到單，之後就考驗公司嘅execution；因為先前CRWV嘅execution就好似差啲，試過有啲嘢Deliver唔到。兩者估值係唔算平，NBIS暫時喺95-110有一定支持，睇下喺110附近有冇位上車，上方短線阻力喺130-132會有阻力。呢個周五係美股股指期貨結算，噚日唔記得同大家講聲， 呢個星期開始轉炒NQ2606。今晚NQ分水嶺喺24850，初步阻力24925-24950；下一阻力25025-25050，更大阻力25125-25150。下方首個支持24700，下一支持24600，盤中較大支持仍然係24500/24300無變過。

雖然美伊戰事仍未有停火跡象，但港股連跌三個交易日後，昨日顯著反彈，恒指低開29點，早段曾跌147點見25317低位後反彈，午後曾升391點見25856高位，收市升368點或1.44%，報收25834。成交額2644億元，反映戰火下，投資者取態較為審慎。恒生指數今早高開104點，升幅一度擴大至416點，高見26250，剛好升抵100日線但未能企穩，半日升幅收窄至254點或0.98%，報26088，險守20日線；國企指數升81點或0.93%，報8898；科技指數升68點或1.34%，報5180。不過半日成交只有1401億元，似乎就唔多配合半日升幅，半日咁樣升係似挾淡倉同沽空多，因為近三個交易日，沽空比率接近20%，一到呢個比例嘅沽空數量，例牌就會挾下淡倉同沽空，有炒開期指嘅朋友，不妨好好利用呢個反指標。

中美元首會晤延後對港股大市氣氛有一定影響，加上內地兩會缺乏重大刺激方案，令港股向上動力受阻。雖然油價回落帶動美股反彈，但由於美以對伊朗行動或較預期長，油價料維持高位震盪，下午留意20日線即26000水平能否守得住，守唔住，個市隨時又掉頭向返下行。港股暫時25000關雖有技術支持，但上方26200-26500阻力仍大，料恒指繼續續呈區間上落市格局。

麥狄文

(徐狄怡‧證監會持牌人)