盤房來料丨港股跌穿彈上升軌 下方250日線不容再失

油價高企，能源價格持續向上，市場對今年減息預期大減，甚至有交易員預期聯儲局今年未能減息，美股周四早段進一步受壓。道指早段再跌500點；但美國批准部分俄羅斯原油的交付與銷售，消息令油價高位倒跌，道指曾倒升22點。美市收市，道指報收46021，跌203點或0.44%；標指下跌18點或0.27%，報6606；納指跌61點或0.28%，報22090。

阿里巴巴(09988)公布業績，成績表令市場失望，ADS股價急跌逾7%；拖累夜期及ADR回落至25300水平。市場估計今年未必減息，貴金屬遭拋售，現貨金價連跌7日，曾挫6.55%，至最低4502.8美元，跌穿咗4800呢個100日線大位，唔少去槓桿及止損盤遭強制平倉，令跌勢加劇，去到4500先識彈。今早反彈重上4700水平，估計反彈去到4800-4850，呢個位有機會由支持變阻力，炒金嘅朋友仔要注意一下。

至於隔晚早段以科技股為主納指一度跌1.36%，當中Tesla股價收市挫3.2%。美國最大記憶晶片生產商美光科技(Micron)預測本年度資本開支將超過250億美元，觸發市場憂慮投資過度，股價曾跌8.8%，收市仍挫3.8%，Nvidia跌1%。Uber宣布斥資12.5億美元投資Rivian自動駕駛車隊，股價先升後跌1.7%；波音跌2.3%，為跌幅最大道指成份股，麥當勞跌1.9%，3M跌1.6%；油股雪佛龍跟油價升1.4%，為表現最強道指成份股。雖然納指走勢真係麻麻，但睇返納指七雄，其實一路都守住喺支持位，望住納指七雄，又真係唔多覺美股走勢係咁弱。

噚日提到115買NBIS，收市上返121.52，都叫買咗個低位；另外RDW真係守到9元即彈，又彈返去9.63收市，短炒捉到上車位。ONDS又係食完糊去返上車嘅射程範圍，撈返一注10.5，守到9.5又等下有冇11.5至12。NQ噚晚早段彈到24750就無以為繼，早段插手落到25300-25350最後一個支持位反彈，今晚暫時個分水嶺都仲係24650，上方阻力24750/24850，下方支持24550/24450，由於今晚係四巫結算，估計未必有太大波腷，經過早兩日急跌，斷估今晚個美股會穩定啲。

中東戰事升級，不僅油價回升，喺美國預期貨幣政策有機會因通脹重燃變得緊縮後，金銀價格急跌。由於近數月金銀投機成份愈來愈高，加上少資金以槓桿炒作，金銀價格急跌，跌破關鍵支持位後，觸發大量止蝕訂單，不少倉位被強制平倉，加劇跌勢。而相關拆倉活動，亦進一步引發周四環球股市進一步下滑，港股亦捱沽。昨日恒生指數低開474點，盤中最多跌576點至25449低位，收市跌524點或2.01%，報收25500。不過成交額增至3062億元，雖然有一定沽壓，但樂觀少少睇，呢個水平資金亦願意接貨。

至收市後阿里巴巴(09988)公布業績，利潤與收入均未符預期，令市場失望，其股價於ADR急挫逾7%，低見122元水平，加上美股早段跌勢持續，令夜期一度急跌至25100水平，其後美股跌幅收窄，夜期反彈至25300水平，ADR對應恒指亦跌近200點至25300水平。恒生指數今日隨夜期及ADR低開163點，早段曾倒升63點，見25563高位，可借連5日線同10日線嘅尾燈都見唔到就再度回落。而A股早段腳軟，拖累恒指曾跌203點至25297，又重返噚日低位之下。雖然半日A股收市，上證終守4000水平，倒升6點，但恒指維持跌勢，半日跌160點或0.62%，報25340；國企指數跌82點或0.94%，報8613；科指跌84點或1.7%，報4911。半日成交1541億元。

港股後市仍受當下幾個不明朗情況困擾，包括央行貨幣政策、中東亂局及油價等，均困擾市場情緒。目前恒指上方阻力喺26000至26300水平，下方支持為25000-25100，即250日線。留意25000水平不容再失，由於24600-24900有一個頗重嘅牛證區，一旦跌穿25000，借勢向下回收該批牛證。至於反彈阻力重重，期指昨日成交密集區為24450-24650，先觀察大市能否企穩24450密集區底部，如企穩則上方反彈阻力為25550/25650/25750。暫時5日線及10日線滙聚於25700水平，25600為由24900水平延伸上去嘅反彈上升軌底部，如大市未能重返此水平企穩，並重返25800水平，即昨日下跌裂口頂部之上，則仍未能脫險，後市料考驗250日線及前低位機會仍大。

麥狄文

(徐狄怡‧證監會持牌人)