盤房來料丨市場揣測息率不減反加震散全球股市

中東戰事持續，油價高企下令市場對通脹重燃憂慮，各國央行上周議息，美國聯儲局保持息率不變，但卻暗示不僅暫時未能減息，若油價持續高企，更有加息可能，交易員將估計今年僅減息一次，轉而將今年10月加息機會上調至50%。全球債市遭拋售，債息急升，英國10年期債息升穿5厘，政府借貸成本急升至2008年金融危機以來最高峰。市場對英國貨幣政策預測有分歧，摩通估計英倫銀行將於4月及7月各加息一次，每次0.25厘，原本預期今年維持利率不變。另外，歐洲央行周四議息後維持利率不變，但德國央行行長納格爾稱，若物價壓力進一步增加，歐央行4月可能需考慮加息；投資者目前預計，歐央行在4月下次會議加息的可能性超過50%。

至於美聯儲方面，負責銀行監管嘅聯儲局副主席鮑曼稱，仍支持局方今年底前減息三次，並料美國經濟今年將保持強勁增長，但關注伊朗戰爭帶來影響。聯儲局理事沃勒稱，由於2月意外出現就業職位流失，原本佢主張減息；但不斷加劇嘅石油衝擊，以及通脹威脅升溫，喺伊朗戰爭影響變得更加明朗之前，需採取更審慎立場。與此同時特朗普表示未有想停火，路透引述華府官員稱，美國正向中東增派數千名海軍陸戰隊員及水兵。美國向中東增派海軍陸戰隊員，令市場揣測美國或為地面戰作準備，市場認為戰事比先前預期拖得更耐。美股上周五顯著下跌，道指盤中曾跌652點，低見45369，收市仍跌443點或0.96%，報收45577；標指跌99點或1.51%，報收6506；納指跌443點或2.01%，報收21647。

上周四大部份阿Man關注或持有嘅美股都仲守到支持位，但到周五大部份股份已跌至警界線，喺遵守短炒紀律下，若然午後盤前開市都未有起色，又守唔住啲支持位，唔排除減減磅先。順帶一提，呢段時間太多不明朗因素，唔建議用孖展買美股，寧願守住個組合，持有返多啲現金，真係再殺深啲，都有子彈買貨。若然手上嘅股份唔穿支持位，就持有住先，都係不加不減，如果呢兩日守唔住支持位，咁止蝕咗短炒嘅貨先再算。NQ今晚好淡分水嶺24000，支持23900/23800/23700/23600；反彈阻力24100/24200/24300/24200，留意NQ23600係250日線附近，23600不容有失。

至於港股上周四結束反彈後，連跌兩個交易日，恒生指數周五跌223點，中段一度低見25121，逼近250日線水平，收市收25277，按周跌188點。由於周五晚美股顯著下跌，港股ADR比例指數收報24602，較港低675點；夜期收報24725，低水552點。今早亞太區股市普遍跌2%以上，黑期今早於25700水平徘徊，今早恒生指數裂口低開488點，半日最多跌880點，低見24396，半日報收24400，接近半日低位，跌876%或3.47%；國指跌261點或3.05%，報8312；科指跌151點或3.11%，報4720。

上周五阿Man提到25000水平不容再失，加上24600-24900有大批牛證，結果一開市呢批重牛全數被回收。以為咁大個裂口，殺咗批重牛會彈一彈，誰知淡友得勢不饒人，進一步向下至24400，再KO多過千張期指嘅牛證先停手。由於唔少重磅藍籌股嘅RSI 2都已跌穿咗5呢個極度短線超賣水平，斷估今日呢3%跌幅已差不多，應該可以守一守24400呢個位。嚟緊兩日睇下個市有冇做返個後抽反彈，不過喺中東戰市所困擾，目前美國或伊朗雙方，均擺出一副唔怕持久作戰嘅強硬姿態，暫時未有重返談判桌意圖，估計環球股市短期仍承壓，港股就算有個後抽反彈，亦唔會彈得多。

反彈先睇第一個阻力就係250日線約25100左右，企到25100水平，啱啱上周五嘅低位，亦係今日個下跌口頂部，企得穩就仲有得彈，企唔穩就企咁先。由1月底高位28056延伸至今嘅下降軌平衡通道底部目前喺24000左右，頂部過兩日會落到25900左右，究竟係先落去考驗24000，定係先反彈上25900，就要留意25000-25100呢個位。而25900-26200為近三個月大型成交密集區，即使企穩250日線25100水平再反彈，反彈到25900-26200呢個範圍，應該幾大阻力，而喺呢個通道範圍之內，仲有5日線約25400、10日線約25550同20日線25750幾個阻力，反彈之路並唔易行，今日唔建議入場撈貨住，寧願等市況穩定返啲，甚至係反彈做後抽，唔企返條250日線，有貨嘅減一減都無壞。

麥狄文

(徐狄怡‧證監會持牌人)