盤房來料丨美伊雖有意停火 待油價回落方能再現升勢

美國總統特朗普表示即使霍爾木茲海峽尚未重開，仍願意結束對伊朗的軍事行動，不過侵侵TACO次數太多，都未足以令市場相信中東戰事可以停落嚟，但當伊朗總統佩澤希齊揚亦釋放停戰訊號，稱德黑蘭願意喺確保唔再遭受攻擊情況下結束戰爭，市場終於有較大反應；消息令市場憧憬雙方有望停火，油價從高位滑落，美國債息亦回軟，帶動美股周二又嚟多次報復式大反彈。道指裂口高開325點後，升幅曾擴大至1167點，高見46383；收市仍升1125點，報數46341。標指及納指亦以緊貼全日高位收市，標指升184點或2.91%，報6528；納指彈795點或3.83%，報21590。

紐約期油曾抽高3.87%，見每桶106.86美元，喺美伊雙方有意停火下，收市倒跌1.46%至101.38美元。不過目前紐約期油仍高企於100美元之上，Miller Tabak首席市場策略員Matt Maley坦言若然霍爾木茲海峽航道繼續如現時般受到限制，油價將高企甚至升至更高水平。

由於噚日阿Man未有盤前作任何部署，短炒無買任何貨，今晚會睇返ONDS同ALAB先，ONDS，8.5至9元蚊上車，7.8-8元做防守，上面都係睇返10.5至11.5左右。至於ALAB，睇下有冇105-108撈返啲，用個95-98做防守，上面目標先睇返110企唔企得穩，就上返120至125。而TSM一直想趁大市回調喺300-320美元收集，分別喺300/310/320都有OTC買盤，結果只係中咗320一個買盤，其他兩個盤繼續擺住先，都係用返個280做防守。暫時雖然美伊雙方均有意結束戰事，但原油供應無回復正常，油價高企仍會對通脹構成威脅，不得不防，一日個市未回復升勢，都係保守少少好。

至於今晚NQ個好淡分水嶺喺24000，暫時呢個位接近10日線，要企定定，個市先有得再彈。下方支持為23900/23800/23700/23600，上方阻力24100/24200/24300/24400。留意24400為20日線，呢個位由前支持變阻力，NQ要扭轉弱勢，真係要企穩24400，再收復24600條10周線，咁先叫合格。

中東戰爭導至環球股市3月顯著回調，當中以日經指數重挫13.2%最傷，均為2008年10月以來最傷；南韓KOSPI指數收市跌4.3%，自2月高位回落接近20%，已處於熊市邊緣。不過美伊雙方願意停戰，料環球股市將迎來一波反彈，不過要回復牛市行情，油價至少要回落至80美元之下，以防止油價高企推高通脹，阻礙減息。美國10年期債息最多回落6個基點，報4.282厘，對息口較敏感2年期債息降低5.13個基點，至3.7766厘。美滙指數一度下滑0.7%至99.81，日圓升0.67%，報158.66兌每美元。市場氣氛無咁崩緊，加密貨幣「一哥」比特幣反覆升3.9%，報68495美元。

至於港股呢邊昨日表現反覆，恒生指數3月累跌7%，噚日喺首季最後一個交易日，恒指仍未能重上二萬五大關。恒指先升後回，一度倒跌191點，低見24559，午後收復失地，但僅剩37點升幅，報收24788，全日成交2557億元，臨近長假期成交縮減亦無可厚非。不過至晚上伊朗亦表示願意停戰，係特朗普表示與伊朗展開談判以嚟，伊朗首度開腔表示有意停戰，消息刺激美股大幅反彈，夜期及ADR亦跟隨向上，重返25200水平。今早黑期高開25300水平，恒指裂口高開。

恒生指數高開569點，半日曾升606點見25394半日高位，中午升489點或1.97%，報25277，暫未企穩20日線。預計25350呢條20日線水平，未必能一日可成功企穩，加上裂口急升，有機會先喺現水平整固一下，先有力再向上挑戰50及100日線。若然港股已成功尋底，料呢幾日個25000可以守住。至於要扭轉跌勢，除咗要先企穩20日線即約25350-25400，並突破25400，由1月延伸至今嘅下降軌底頂部，企穩25400方有條件再向上挑戰50日線及100日線，即26100-26150兩線滙聚區。如要重展升浪，非要重返所有平均線之上，企穩26200水平，方有機會再向上挑戰高位。

麥狄文

(徐狄怡‧證監會持牌人)