盤房來料丨港股雖脫險但仍難言轉勢

美國與伊朗同意暫時停戰兩周，霍爾木茲海峽可望重開，而卡塔爾亦據報着手恢復液化天然氣(LNG)生產，以紓緩能源危機憂慮，油價急挫逾一成。油價回落令通脹有望降溫，市場再度押注美國今年內減息，刺激環球股市周三強勁反彈，道指噚晚一度爆升逾1400點，俗稱「恐慌指數」嘅VIX波動指數最多急回22.77%至19.91。最終美股收市，道指報47909，升1325點或2.85%；標指升165點或2.51%，報6782；納指大幅反彈617點或2.8%，報22635。

ONDS噚晚一度見10.42，但就差少少未到10.5個食糊位，點知盤中又回落至10美元樓下，不過買倒平貨，唯有再等下。至於ALAB就超出預期，噚晚見都守住120美元樓上，都係keep住先。呢期想吼下NFLX，大摩最近出咗報告，摩根士維持NFLX嘅Overweight評級，目標價由110美元上調至 115美元。報告指Netflix業務簡單、可見度高、波動性低，估值應重回30倍以上。跟返大摩個目標價110至115美元，93至98元買入，用返個90元做防守，博個市定返啲，NFLX上返三位數。至於NQ噚晚一度上過25250呢個阻力就回頭，暫時都無回測條50日線24750左右，但相信要啲時間先可以企穩25150即係條100日線。今晚個分水嶺喺25050，支持24950/24850/24750，上阻力仍然係25150/25250/25350。

紐約期油收市跌16.41%，每桶報94.41美元，日內一度低見91.03美元，跌幅達19.4%；但今早有消息指黎巴嫩被以色列空襲，紐約期油回升至97美元水平，剛好港股有個藉口做下回調，畢竟噚日咁大個裂口高開，升得急咗少少。港股噚日升776點後，今早恒生指數低開136點，半日最多跌239點，低見25653點，半日跌幅收窄至91點或0.35%，報25801，成交1266億港元，成交縮咗水，似乎嚟到25800水平，資金又唔係太積極入場。

雖然美伊雙方都有意結束戰事，談判期兩周仍存唔少變數，但估計衝突唔會好似之前咁嚴重，不過霍爾木茲海峽通航情況仍要觀望，油價好難一下子重返開戰前水平。由於噚日遺下一個巨型上升裂口，如果大市回吐失守25600，短期先回補裂口機會仍存在，即係個市有機會要回返去25300-25400水平，呢個位應該有一定支持。至於上方尚未挑戰50及100日線，大約係26100-26150左右，而26300條頸線阻力更大。技術走勢上恒指要重返頭肩頂形態之頸線上，才會吸引更多資金入場。由於科技股目前收復力度仍不足，暫難言已回復升勢。料大市仍會隨中東局勢變化而反覆。短線留意下方支持25600/25300，上方短線阻力為26000/26200。由於昨日遺下巨大上升裂口，如今明兩日回補裂口約25300水平後，要企穩20日線，即守穩25400水平，企穩於下降軌之上，港股方能擺脫劣勢，短線或於25300-26300水平進行整固，再突破頸線26300，港股方有條件再展升浪。

短期都係炒股唔炒市，不如睇返有乜個股可以吼下更具勝算，噚日分析過嘅順豐同城(09699)今日隨大市回吐，正好有個收集機會。今日就睇睇洛陽鉬業(03993)，公司2025年度業績符合預期。依家市場再度押注今年美國點都會減息一次，對金價同其他資源價格帶來支持。洛鉬喺2025年就開始積極布局黃金資源，新增產能釋放可期，黃金板塊將逐步成為公司業績新增長點。至於公司嘅銅業務，則有望受益於AI發展，長周期需求空間打開。銅在供需結構向好背景下，預計銅價中樞仍上行。洛鉬鎖定「銅金雙極」，構建長週期資產底盤，有望受惠量價齊升。吼位17-18元買入，以16元作防守，目標20-22元，中線目標23-25元。

麥狄文

(徐狄怡‧證監會持牌人)