盤房來料丨中東局勢未明 港股區間上落

上周五美股個別發展，道指跟標指回吐，道指跌269點或0.56%收市，報47916；標指回吐7點或0.11%，報收6816；納指則升80點或0.35%，報收22902。上周累計道指及標指反彈逾3%，納指更反彈高達4.7%，重磅科技股以英特爾表現最突出，一周累計升逾兩成，真係完全走漏眼。

好彩上周低吸嘅ALAB表現都唔差，周五進一步升多15%，一度高見150美元，雖然盤後回落至146美元，可以推止賺至140美元繼續持有。至於ONDS表現就另人有啲失望，暫時仲喺9美元附近上落，總之守到8美元都係坐住先。至於CRWV，周五股價再急升一成，已重上100美元之上，有貨可以用個90美元做防守持有。至於NBIS喺110美元上車嘅貨，現水平可考慮先減半，有回落至130美元左右又撈返，防守位就推高至120美元。NFLX等位收集，呢個星期下有冇95至98美元上車。至於NQ今日個好淡分水嶺喺25000，下方支持24900/24800/24700，24700至24750條50日線應該守到；至於上方阻力25100/25200/25300，25100-25150條100日線企返穩，個反彈先有得繼續。

美國3月通脹升至3.3%至兩年高位，幸而美國經濟基本面穩固，勞動力市場趨於穩定，貨幣政策處於良好位置，足以對通脹構成下行壓力，同時又唔會損害勞動力市場，不過喺油價高企下，料要通脹回歸聯儲局目標即2%，或者需要更長時間，令聯儲局喺利率問題上較為保守，今年上半場幾乎肯定減息無望。目前市場仍觀望中東局勢發展，但喺戰事消息日日變期間，市場頻頻出現疑似內幕交易，口痕友都話侵侵借美伊戰爭大發戰爭財。其實侵侵本身係一個商人，以利益行先亦好正常，雖然無證據顯示佢本人進行內幕交易，但市場普遍認為佢同整個家族，由上任本屆美國總統至今，應該透過喺資本市場消息操作，撈咗唔少油水。

周末期間美伊談判未有結果，美國宣布由13日起開始封鎖霍爾木茲海峽，攔截所有喺國際水域向伊朗支付通行費船隻，並摧毀伊朗喺海峽中布下嘅水雷。美國此舉再度刺激油價回升，紐約期油於今早亞洲時段急升8%，重返105美元水平，而美股股指期貨下跌，港股今早於黑期時段亦重返25700水平附近。恒生指數今早低開184點後跌幅擴大，最多曾跌385點至25508，半日跌306點或1.18%，報25587；國企指數跌64點或0.74%，報8590；科技指數跌47點或0.97%，報4812。半日成交1153億元，成交縮減係市場對於能見度正減弱嘅港股抱觀望態度，未有貨嘅唔急買，有貨嘅就耐心等候。

不過市場早已預期美伊談判難以一次成功，但上周停火協議反映雙方已無意再戰，談判未達成協議負面效應料有限。美國反封鎖霍爾木茲海峽，料為下一輪談半取爭取時間再作部署，同時亦進行海上掃雷，為日後重開霍爾木茲海峽鋪路。目前，恒指已確認升穿10日線(現處25288)及20日線(現處25367)，而5日線亦升穿10日線及20日線，短線已出現見底訊號，即使今日或受談判未果影響，較上周五收市低開，甚至稍後有機會借勢回補上周三上升裂口25250-25668，但只要一直能保持於3月23日嘅大型下跌裂口24789至25121頂部之上，基本上港股已成功脫險。不過，中東局勢仍未明朗，加上中美本周將公布多項重要經濟數據，而美股業績期重啟，港股目前能見度較低，估計本周恒指或先於25000至26300水平上落，再觀望中東局勢發展。短線恒生指數初步支持25600/25500，較大支持25300；阻力25900/26000，較大阻力26100。