盤房來料丨國際油價處於90美元之下股市仍保強勢

上星期五美股可以話相當精彩，先有伊朗宣布喺以黎停火協議期間，全面開放霍爾木茲海峽予所有商船，美股三大指數周五早段三大指數齊升，標指與納指齊創盤中及收市歷史新高，標指首次突破7100點，納指連升第13個交易日，為2013年以來最長連升紀錄。道指最多升1139點見49717，其後收市升勢回順，因伊朗表明拒絕將國內濃縮鈾運往國外，並指美方海上封鎖違反停火協議。道指最終升868點或1.79%，收49447；標指升84點或1.2%，收7126；納指升365點或1.52%，收24468。

雖然今早道指及NQ有所回吐，但回吐力度唔算大，NQ今早曾低見26550水平，以周五晚NQ一度高見26884高位嚟講，回吐至26550水平見支持反彈重返26600水平之上，美股強勢仍在。個股方面，TSLA竟然400美元都仲企到，不過減咗部分貨，仍然想等個380美元左右先睇撈唔撈得返。NBIS就睇150美元支持力度如何；ONDS唔穿9美元支持繼續持貨；CRWV個支持位推高去110美元，落到支持位可以撈返上周食糊嘅部份貨。今晚NQ好淡分水嶺26600，支持26500/26400/26300；阻力26700/26800/26900。

周末期間，中東火藥味濃度重新升級，伊朗總統佩澤希齊揚與巴基斯坦總理謝里夫通電話時表示，美國喺談判及停火期間持續表現出背信棄義行為。美國繼續實施所謂海上封鎖等挑釁性、非法舉動，不僅公然違反停火協議，亦違背聯合國憲章宗旨原則。此舉不僅令美股股指期貨今早回落，紐約期油今早一度反彈近7%，以為日韓股市會受油價反彈拖累，結果日韓股市不跌反升，港股亦安然無恙。雖然恒指高開44點，一度倒跌65點，見26094，但100日線(26081)守住，50日線(25982)更未受考驗，結果5日線(26150)一企穩，承接A股升勢，恒指最多升251點，見26411高位，中午報收26376，升216或0.82%；國企指數升68點或0.77%，報8913；科技指數升38點或0.77%，報5081。半日大市成交1353億元。美伊戰爭爆發已今已逾一個月，恒指一度低見24203即展開反彈，而上周二10日線升穿20日線，更已收復50日線及100日線，已突破由1月高位28056延伸出嚟嘅下降軌之上，不過喺短線超買下，再借戰事消息作調整。只要恒指仍守於25500水平之上，不失20日線，料後市反彈可持續，進一步挑戰26500至26600水平，甚至26800水平。

麥狄文

(徐狄怡‧證監會持牌人)