盤房來料丨期指結算前港股表現疲弱

中東局勢暫陷入僵局，美伊談判未見有進展，油價持續高企，美股周一反覆，三大指數個別發展。道指低開118點，一度倒升122點，高見49353，但未幾已倒跌，最多挫201點，雖然跌幅收窄，但收市道指仍跌62點或0.13%，報49167；標指轉升8點或0.12%，報7173；納指倒升50點或0.2%，報24887。標指跟納指早段雖下跌，但兩者仍再創即市及收市新高。

重磅股方面，Nvidia股價上周五自去年10月以來首次破頂後，周一收市再創新高上揚4%，為表現最強道指成份股，其市值已達5萬2千億美元。市場關注Alphabet、微軟、亞馬遜、Meta及蘋果本周公布季績，因四股市值總額已佔標指比重達25%。英特爾(Intel)上周五業績後股價炒高逾兩成後，周一續升3%創新高，愈升愈有，但已追唔貨。

CRWV撈返嘅貨未有太大起色，但暫守100-110，持有先。NBIS上唔返150，盤中穿過140美元又上返，似乎又唔係太差，仲有一半貨未走，如果守到140，考慮回補返163美元沽咗嘅貨。MU再升超過5%，已經上到520美元樓上，更加唔想追貨住。ONDS無太大變化，繼續等11.5至12美元食糊。RDW表現係有啲令人失望，但都係睇住個8.8防守位先。ALAB落返200美元樓下，短炒等回到180-185準備撈貨，但講真估值唔算平，無180-185都唔考慮，反正短短兩星期接近賺一倍，有耐性再同佢等下。NFLX預咗要等，暫時擺埋一邊先。

至於呢個星期有幾隻重磅股公布業績，當中較值得博係微軟，有報告指佢個股價自第二季以來跌咗12%，主要因為Azure與M365商務業務短期缺乏轉折點。進入第三季，市場焦點轉向M365商務及Copilot採用情況。Azure預期已下修，市場唔會再期待大幅超預期。PE從30倍壓縮至21倍(2027年EPS)，考量其能見度、RPO與AI變現路徑，風險回報改善。RPO維持穩健成長；資本支出持續擴張，但增速放緩；營運利潤率喺AI投資下仍可小幅擴張，長期睇好。微軟目前以21倍PE交易，低於同業(Google 28倍、亞馬遜25倍)，報告認為目前係具吸引力嘅切入點，目標睇返675美元。依家呢啲位買用400做防守，如果想博業績。至於NQ再創新高，噚晚一度落到27300附近反彈，暫時短線睇係咪27300有初步支持。今晚個好淡分水嶺27350，支持27250/27150/27050；阻力27450/25550/27650。

港股噚日係悶局一場，恒指低開1點後，最多曾跌119點見25858低位，盤中曾倒升107點見26086高位，可惜二萬六關未能企穩，未能成功挑戰100日線，即26100水平，險守50日線，暫未見太大方向，好淡爭持。不過AI主題及晶片股仍受捧，但傳統重磅科技股則偏軟，而有消息指支付平台不得為貸款及金融產品提供營銷接口，騰訊(00700)股價因此跌3%，跌至接近早前低位，更首次收市低於480元水平。雖然市場對中東局勢對市場影響而逐步淡化，但霍爾木茲海峽全面通航仍遙遙無期，油價持續高企下，港股更為乏力。加上明日期指結算，呢兩日為轉倉高峰期，指數缺乏方向，本周只有四個交易日，投資者心態更偏向審慎。

恒生指數低開111點，一度跌196點至25729，半日跌173點或0.66%，報25752，險守20日線；國企指數跌82點或0.94%，報8673；科技指數跌60點或1.23%，報4879點。半日恒指暫守20日線，唔排除午後進一步下試25600-25650水平，考驗10周線及30日線，短線25500-25600水平不容有失，而25900-26000似乎喺結算前變成阻力，結算前或先於25500-26000之間窄幅上落，待結算後再睇向上定向下突破。

麥狄文

(徐狄怡‧證監會持牌人)