盤房來料丨美股續波動 港股250日線爭持

環球通脹憂慮加劇，美國30年期債息衝上5.19厘，創2007年以來約19年高位，日本同英國嘅國債息，亦升到嘭嘭聲，美股周二繼續受壓，三大指數回軟。美市收市，道指跌最多441點，收市跌幅縮至322點或0.65%，報49363；標指跌49點或0.67%，報7353，連跌3個交易日；納指盤中曾跌1.5%，收市跌220點或0.84%，報25870。不過盤中納指曾經轉過燈倒升，唔少個股都有過反彈，喺美股隔晚跌市中，竟然都有糊食。

先講之前喺195美元撈返貨嘅ALAB，有本事再上返前高位250美元水平，單日急升16%，忍唔住喺250美元落咗車，等回調有冇230-240美元又撈啲貨，繼續游水。至於CRWV就坐緊艇，105/100美元嘅兩注，噚晚本來等緊95再接貨，就係差嗰一啲啲接唔到，防守90-93美元守住，都係睇住先。NBIS喺180美元接返嘅貨，170美元防守做得幾好，噚晚上過200美元水平，但無落到車，只要守到170美元，都係想等佢上返210-220美元再算，INTC成功喺103美元上車，守住個100美元，下方支持睇95-98先，呢隻打算睇長線啲，目標係130至150美元，至於GOOG等緊第二注買入，暫時未到價，等等先。MU就極為精彩，之前買咗三注，分別係715、685同665，開市一嘢飛到逼近700美元，先喺695美元減返一注，無耐又殺返落去最低653，見650無穿，655回補返沽出一注，其後再爆上720美元，計一計數，低位彈咗10%，723美元又減多注，成功甩身715嘅貨，家下手上嘅貨大約平均價係650美元左右，正正係短線較大支持位，只要短線守住，MU雖然估值貴咗啲，但只要美股完成調整再發力，MU都仲有機會重返750-800美元水平。

噚晚一堆科技股單日波幅咁精神，當然個NQ都夠晒水位畀我哋炒，結果喺幾個支持同阻力方面，支持位略穿28700，去到盡，上方高位逼近29200，來回成500點波幅，又繼續做個500點波幅畀你玩，識炒都真係好好炒。今晚NQ個分水嶺28900，支持28800/28700/28600，上方阻力29000/29100/29200，除非向下打爆個28600，咁就有機會退守28500/28300。至於上面，打得爆個29200，先再睇返前頂。

昨日港股反彈，恒指最多曾升170點至25845，收市升122點或0.47%，報收25797，守住250日線，並重返50日線約25774，成交額2721億元，北水由周一淨流走，改為周二淨流入。港股目前仍處於調整之中，上周未能重返27000後，再度失守多條移動平均線，並一度考驗250日線約25600水平，昨日展開反彈，可惜外圍股市亦開始進行調整，影響整體氣氛，反彈之路遇上重重阻力。

今早恒指低開88點，A股又唔多生性，淡友乘機踩多腳，大市最多跌242點，低見25555，略跌穿250日線，其後喺25600水平喘定，並於250日線附近爭持，臨近中午跌幅略為收窄，半日跌142點或0.55%，報25655，半日成交額1407億元，又唔算多，北水今日繼續掃貨，淨流入54.68億元。暫時個市好似想守住250日線，但其他移動平均線全失，大市要上得返25800，企穩條50日線，先有機會反彈，進一步挑戰5周線及10日線，約26000水平，料26000水平為首個反彈阻力。相反，今日若失守25600水平，則向下回補4月8日上升裂口25254-25668機會較大，裂口底部25200水平料有一定支持。如25200亦告失守，則下方25000心理關口為下一支持。回補裂口後，如能迅速收復250日線及50日線，則調整有望完成，港股或繼續於25000-27000大型區間內上落。

麥狄文

(徐狄怡‧證監會持牌人)